Dewleta qetilkara domon-qeçikanê Kurd, serra 1988’î ra na het qeçikanê Kurd xo rê kena hedef. Na rejîma fek gonî 27 serran miyan de 500 ra vêşî domonê Kurd qetil kerd. Polîs û cendirmeyê ke qanûnanê dewleta xora qûwet gênê jû bi jû domonanê Kurd kişenê. Zerreyê nê qeçikan de taynê ci hewna nêkewtibî 2 serriyê xo. Taynê ci, 3 serrî, taynê ci 7, taynê ci des.
Dûran Abdullah Kaya, Uğur Kaymaz, Berivan Kara, Mehmet Uytun, Solîn, Ceylan Önkol, Berkîn Elvan seyan domonan ra tenya çendê ci yê. Qurbanê peynî zî Nihat Kazanhan’o 12 serrî ke 14’ê na aşmî de cizîr de ame qetilkerdin o. Tenya domonî nê, herzewbîn gencê Kurd û yê azadîwaşt zî hedefê dewleta gonîrijn de yê. Persa ke ma bikerê naya; “çima qûwete dewlet qeçik û gencan kenê hedef’?
Çi ke domon û gencî ameyinê civakî yê. Damarê dînamîk yê tarix û nikayî yê. Faşîzm û dîktatorî qebûl nêkenê. Dewlet nê qeçikan ra tersena, cok ra xo rê kena hedef û kişena. Çiyo do bîn zî no yo ke, tirkiye de qîmetê ciwyanê kesî çinyo, cok ra cezayê kiştişî zî çinyo. Heta nika kancî polîs rîwalê ke jew hemwelatijî kişt ceza girot. Nimûneyê peynî dawaya Alî Îsmaîl Korkmaz o. No genc 2 Haziran 2013’î de wextê biyayişanê Gezî de hetê polis û piyakaranê ci yê faşîst ame derp kerdin. Ali Îsmaîl 38 rojî koma de mend û pey coy weşiya xo kerd vinî. Roniştişê peynî yê dawayê Alî Îsmaîl’î 21ê na aşmî de amê vînayin û derheqê kiştoxan de qerarê beraat ame ame dayen. Bi vatişê bîn, kiştoxan ceza nêgirot û qandê ke qeçikê newî bikişê serbest viradiyay. Jew polîso ke veriya coy derheqê ci de cezayê muebet ame dayen, cezayê ci ginay war û tenya 10 serrî ceza day.
Na dewleta kiştoxa qeçikan cayo ke kiştoxan ceza bikero, bi tazmînatan, bi pereyan wazena hêrs û janê malbatan bihereyno. Na dewleta bê ar û bê wijdan waşt bi tazmînata 28 hezar veng û hêrsê malbata Ceylan Önkol ya ke 28 Îlon 2009’î de Lîce de amê kişten û ganê ci merg de bi lete lete bibirno. La malbata Ceylan cewabê do rind da û ard ziwan ke ciwyanê Ceylan nîro roten û waştena cezakerdişê kiştoxan kerdî. Serva domonê ke Roboskî de amey qetilkerdin de zî dewlet waşt bi çend hezar pereyan na dawa bigîro û sucê xo binimno.
Nê nimûneyan kes şeno vêşî bikero. Bi belgeyan werte de yo ke na dewlet no 40 serriyo hezarî Kurdî qetil kerd. Serva dewlet camêrd, cenî, genc, kal-pîr, qeçik ferq nêkeno. Dewrê AKP de zî nê kiştişî dewam kerdî. Reîs-cûmhûrê no welatî polîsê qetilkar bimbarek keno, xelat dano înan. Cok ra peyniya kiştişan nîno.
Cayê xoverdayin û serhewedayinan Cizîr de 27ê Kanûn ra heta na het panc domon-qeçikê Kurdî mey kişten.14’ê na aşmî de zî qeçiko 12 serrî Nihat Kazanhan bi guleyê tifinga polîsan ame kişten. Rixmo ke şahîdê biyayiş estê sermiyanê bê ar yê dewleta qetilkar îdia kenê ke mesele mavêna PKK û Huda-Par de ya. Rejîma qetilê qeçikan verra hereketê serbestiyê Kurd jû hetî ra bi qûwetanê xo yê fermî, heta bîn ra zî bi destê rêxistinanê çete yê îlegal yê zey hizbûl-qontra herb kena. Wazena reyna-fina Kurdan biyaro pêver û bido piro. Dewlet û hikûmeta ciya tarî se vanê wa vajê, ê dê gunayê nê qeçikan û hesab dayişê goniya înan ra nê reynê. Na dewleta qetilkar endî neyra tepya nêşena xo binimno. Çi ke raştî werte de ra û hetê herkesî yena zonayen. Sermiyanê na dewleta gonîrij bi serrano tirkiye açarnay zey mezeleyê domonan û ê dê goniya domonan ke rijnay de bifetisê.