Sereka Pêroyî ya Komeleya Heqê Merdiman Eren Keskîne zî derheqê qerarê redkerdişî yê Mehkemeya Heqê Merdiman ya Ewropa (MHME) yê muracatê Rayberê Şarê Kurdî Abdullah Ocalanî de qisey kerde. Keskîne daye zaneyene ke MHME hetê huqûqî de nê, hetê dewletan de ya.
Keskîne va ‘MHME demêko derg o ke hetê dewletan gêno’ û wina domnaye: “Heta nika muracatê ma bênetîce mendî. Qerarê ke derheqê Ocalanî de yenî girewtene, polîtîk î. Tecrîd bi xo îşkence yo. Eke tena tecrîd ra biewnîyo, ganî MHME lehê Ocalanî de qerar bidayêne. Labelê eke qerarêko winasî bidayêne, o wext têkilîya înan Tirkîya reyde xira bîyêne. Cok ra qerarê redkerdişî da.”
Keskîne dîyar kerde ke yewna rey ame dîyayene ke wexto ke babete bena Ocalan, huqûq nêmaneno û wina va: “Serranê 90î de qerarê hîna baş vejîyayênê. Labelê 8-10 serranê peyênan de MHME lehê dewletan de qeraran gêna. Her cayê dinya de vera MHME de reaksîyonî estî. Hedefê ma o yo ke ma huqûq verhukman ra durî bikerî. Ma do hem herême de hem zî hetê mîyanneteweyî de têkoşînê xo yê huqûqî bidomnî.”
JINNEWS / ÎZMÎR