Mehkemeya Heqanê Merdiman ya Ewropa (MHME) 2 rojî verê muracatê ke seba Orhan Tunç û Omer Elçîyî ameybî kerdene ser o bajarê Strasbourgî yê Fransa de roniştişêk viraşt. Cinîya Orhan Tunçî Guler Tunçe, Cinîya Mehmet Tunçî Zeynep Tunçe û temsîlkarê dewleta tirkî ke wextê qedexeyî de wezîfedar bî, beşdarê roniştişê doze bîyî.
Guler Tunçe derheqê roniştişî de qisey kerde. Tunçe va ‘pawitişê ke roniştişê doze de ameyî kerdene, herkesî ser o tesîr kerdî’ û wina domnaye: “Yewna rey ame dîyayene ke kam heqdar o. Pawitişê ke ser nameyê dewleta tirkî ameyî kerdene de ma dî ke çîyê verê cû vajîyayêne, dibare bîyî. Seba ke sewbîna vatişê înan çinêbi, çekuya ‘teror’î dibare kerdî.”
Guler Tunçe dîyar kerde ke aye hêvî kena ke MHME do qerarêko bîyaye bido û wina va: “Seba mi mehkemeyêka zaf hîsine bî. Na doze seba heme şarê Botanî şansêk a. MHME bi xo zî şahidîya nê wehşetî kerd. Ez eşkena vaja ke ser nameyê Botanî rojêka tarîxî ameye cuyayene.”
MA / ŞIRNEX