Cinîya bi nameyê Sewra Hemûd El Hemdê bi sebebo ke cixara şimito hetê DAÎŞ amê tepiştiş û 17 rojan raştê îşkence amê. Keynaya Hemdê ya 16 serrî zî rîwalo ke xo ra dayenê çarşefa sîya red kerd, orteyê kuçe de amê gulevornayen. Sewra Hemûd El Hemdê da zonayen ke ay rojeke gankêşîyê keynaya xo temaşe kerd. 

Operasyonê Quwetanê Sûrîyeya Demokratîk (QSD) yê Tebqa rameno. Şervanê ke taxa Hey Ewwel vistî bin qontrolê xo, operasyon ver bi taxanê Hey Tanî û Salîs rameno. Şervanan sûk û çormeyê ci de destpa xebatê pakîye kerdî. Xêlê banê ke zey nêweşxane, cebilxane, girotxane û merkezê îşkence amey kararden vistî bin qontrolî. Mehleya Muhacirî ke DAÎŞ zey girotxane kar ard de rêçê tarî mendî. Cinîya bi nameyê Sewra Hemûd El Hemdê ke no girotxane de mend û raştê îşkence amê, behsê qewimyayîşan kerd. 

Rîwalo ke cixara şimite

Hemdê, ya ke 39 serrî ya û maya 2 domanan a, taxa Muhaciran yê Tabqa de ronişt. Merdeyê Hemdê verîya 3 serran, netîceyê bombevornayîşî de weşîya xo kerd vinî. Hemdê bi sebebo ke cixara şimite hetê çeteyanê DAIŞ tepêşîya û erzîya girotxane. 

Sewra Hemûd El Hemdê da zonayen ke a 17 rojî hucreyê yew kesî de mend û wina dewam kerd: “17 rojan îşkence mi rê kerdî. Kesê ke rîyê înan giroteyî bî day mi ro. Giştê min ê ke cixara tepiştî zî şikitî. Çiyê winasî mi rê kerdî ke, hinî psîkolojîya mi xirab bî. Ver çimandê lajê min o 6 serrî de îşkenceyê mi kerdî. Winî kerdî ke, wexto ke yewo xerîb nezdîyê mi bi, lajê mi berma.”

Keynaya ci qetil kerdî

Cinîya mexdûr da zonayen ke, wexto ke 17 rojan ra dima serbest veradîya, psîkolojîya aye xirab bî. Hemdê vist vîrî ke tayî mend ke a xînt (bome) bibo û enê deyatan da: “Bi sebebo ke ez odeyêke tarî de menda û mi tîj nêdî, wexto ke ez serbest veradîyaya mi zehmetî antî. Zilma înan bi nayî ra sînordar nêmend. Waştî bi zorî çarşefa sîya keynaya mi Firyal a 16 serrî ra dê. Bi desan reyî vate keynaya mi werdî (qijkek) ya. Rojeke kuçe de rîwalo ke çarşef xo ra nêdabî gule rijnay ser keynaya mi. Mi keynaya xo mîyanê gonî de ard keye. Destûr nêday ke ez ay hewada nêweşxane. Keynaya mi rojekê ra dima weşîya xo kerd vinî. Mi temaşeyê merdişê keynaya xo kerd. Vernîya çimanê mi de, keynaya mi, mi ra girewtî.”

‘Wa pêrokîn şarî bibê yewe’ 

Sewra Hemûd El Hemdê vist vîrî ke, badê xelesnayîşê sûk ay êşkîya şînê merdişê keynaya xo bigîro. Verîya 3 rojan ez şîya firina ke hetê şervananê QSD amê xelesnayen û mi herkesî rê nan vila kerd. 

Hemdê ard ziwan ke haq/homa no zilmî vîneno û bi nê vatenan qiseyanê xo qedêna: “Ê camêrdanê qilêrîn cuya ma kerd têtewr. Destdergîyê pêro çîyanê ma kerd. La hinî Tabqa azade ya. Wa şarê ma yê ke tîya de ciwîyenê bibê yewe. Wa hinî kes ma hêsîr nêgîro û ma bişêrê xo bipawê.” 


DÎHABER/TABQA