Hemsereka Kongreya Komelê Demokratîke (KCD) û Parlamentera HDPyî ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî ser o esto, bêro wedarnayene 8ê teşrîna peyêne de dest bi grevê vêşanîye kerdbî.
Guvene va ‘çar parçeyanê Kurdîstanî de kurdî yenî qetil kerdene’ û wina domnaye: “Bitaybetî hukmatê AKPyî planê rijnayîşî eşto dewre û no zî problemî giranêr keno. Wexto ke no plan erzîya dewre, hukmatî ewil tecrîd da destpêkerdene. Ewro heme vatişê Birêz Ocalanî yew bi yew benî. Wina kenî ke wa vengê ci nêro eşnawitene. Dewleta tirk dezgehê kurd û Kurdistanî teror îlan keno û tayê ci zî temaşe kenî.”
Guvene dewamê qiseykerdişê xo de wina va: “Mi waşt bi çalakîya xo biba wesîleya hîsanê şarê xo. Wa şaş nêro famkerdene. Bi hezaran fedayîyê Ocalanî estî û her tewir çalakîyan kenî. Mi zî bi îdeolojîyê Birêz Ocalanî xo şinasna. Ez tecrîdî seke mi rê bîyo, hesibnena. Ez zana ke tena sereyê xo nêşena tecrîdî wedarna, labelê ez zî sey morcelayo seba Hz. Îbrahîmî awe kirişeno, xo vînena. Mi rêzê xo yê qehremanê ke verê cû nê zîndanî de çalakîyê viraştî, dest bi çalakîyêka winasî kerda û heta ke tecrîd wedarîyeno ez do çalakîya xo bidomna. Tecrîdî rê bêveng mendene, tesdîqkerdişê tecrîdî yo. Ganî herkes no het de berpirsîyarîya xo bîyaro ca.”
ANF / AMED