METÎN YOKSU MA/ÊLIH Muxabîra Ajansê Xeberan yê Dîcle (DÎHA) ke bi KHKyî ame padayene, Şerîfe Oruçe 5ê Temmuza 2016î de ameybî tepiştene û dima ra tewqîf bîybî. Oruçe badê ke 2 serran zîndan de mende, 9ê Temmuze de ameye tehlîye kerdene. Labelê Oruçe berê zîndanî ver reyna ameye tepiştene û dima ra serbest ameye veradayene. Oruçe qala çîyê ke 2 serrî zîndan de cuyayî, kerde. Oruçe va ‘ez zîndananê Êlih, Mêrdîn û tewr peynî zî Xarpêt de menda’ û wina dewam kerde: “Wexto ke mi berdî zîndanê Xarpêtî, ewja de ez raştê xeylê heqaretan ameya. Labelê ez ewja de bîya şahidê cinîyanê xoverdakaran û ez xoverdayîşê înan musaya.” Oruçe va ‘eke şima rojnameger bî, zere û teber de destûr nêdîyeno ke şima rojnamegerîye bikerî’ û wina domnaye: “Nuştişanê şima ra tersenî. Rojnamegerê ke aşiqê nê karî yî, do hertim raştîyan binusî. Dest ronîya ser mektûbê mi ke qala neheqîyanê zîndanî kerdênê. Rojnameyî nêdîyayênê ma. Odeyê zîndanî bi kamerayan ameyêne temaşe kerdene. Wexto ke cinîyan seba wedarnayîşê kamerayan muracatê Wezaretê Edaletî kerd, eştî ser odeyanê cinîyan ser. Wexto ke şima zere de nê nêheqîyan vînenî, şima fam kenî ke ganî şima hîna zaf nê meslegî bikerî. Hertim lazimîye bi nuştişê raştîyan esta. Ez zî do cayo ke ez menda ra dewam bikera. Ez bawer kena ke rojnamegerê tewqîfbîyaye zî do wina bikerî. Ganî ê zî demêko raver bêrî veradayene. Mi tewr zaf bêrîya kameraya xo kerdbî.”