Rayverê Şarê Kurd Abdullah Ocalan bi komloyekî fînaka no komploye hetanî nika çinêbî û birêz Ocalan ser de heme hêzê dinyaye û hêrişan bi qasî serê derzîyê zî meşa xo ya azadî û cigerayîşê heqîqetî ra tepa gam nêeşt. Seba ke birêz Ocalan her gam û kêlîkê cuyayişê xo seba merdimatî xerc kerdênê. No semed ra zî her tim bîynê hedefê hêzê kapîtalîstî.
Bi taybetî na kompoloya girdî de rolê Rûsya û DYAye est bîy. Înan bi hêza birêz Ocalan û bêzariya hêzê kapîtalîst nîşan da û bi awayekî aşkera vet verê çiman. No ser merdim raştîya birêz Ocalan û komploya ke hemberî ci de baş fam bikero, wa merdim gam bi gam ser meşa birêz Ocalan a 9’ê Citmenge ra heta 15’ê Sibate cipersayişê ke gird bike. Miyanê di dîrokî de 130 roj vîyart. Miyanê no 130 rojî de azadî û heqîqetê de birêz Ocalan her tim seba aştîyeke mayînde geyra û ey 16 serre bêmiyan vindertişê xo domneno.
Seba çareserî şi
Birêz Ocalan cigêrayîşê xo yê aştîye ke 1993’yan dabî destpêkerdiş heta nika domyena. Birêz Ocalan seba verê Şerê Cîhanê yê Hîrêyinî bigîro bi waştişê xo 9’ê Citmenge 1998’an de Sûrîyeye ra vejya. Verîya ke birêz Ocalan bivejo, 7’ê Citmenge de K. Baduvasê yewnanîstanij û heyetê ci reyde amey Şam û bi birêz Ocalan pêvînayiş kerdî. Înan sozê ke seba amadekarîya vejyayîşê Ewropaye bikero day û şîy Yewnanistan. Birêz Ocalan bi vatişê ‘Seba çareserîya sîyasî û aştîye ez şona Ewropaye’ dest bi meşa ver bi Ewropaye kerd. Birêz Ocalan bi balafir şono Balafirawar Ellenîkoye. Çew nêame ver bi birêz Ocalan nêkerd. Nê demê birêz Ocalan zanaynê ke meşa azadî û cigêrayîşê heqîqetî de ey tena serê xo yo.
Parçeyê komploye
Birêz Ocalan hemverê nê îxanetê Yewnanîstanî verê xo da Rûsyaye. Dawetê Rûsyaye ser 10’ê citmenge de şî Rûsyaye. Cîyayîya Rûsyaye zî Yewnanîstanî ra çinê bî. Her di hêzê ke xo sey dost nîşan daynê, her yewê înan zî parçeyek komploye bî. Birêz Ocalan demo ke kilmî de nîyet û rolê înan a komploye dî û Rûsyaye ra têkîlîyê xo birna, verê xo da şaristanê ke xo sey demokrasîya dinyaye nîşan dano, yanî şaristanê Romaye. Kurdistanijê ke eşnawitî ke birêz Ocalan şîyo Romaye, her çar hetê dinyaye ver bi Romaye herikîyay. Kurdistanijî şew û roj nobeda azadîye girewtî. Heme goş û çimê kurdan Romaye de bî. No wayirvejîyayiş û herikyayîşê ver bi Romaye nê planê komplogeran xirab kerd. No semed ra zî hêzê komploger êdî nêşînaynê bi awayekî aşkera hemverê birêz Ocalan helwestê xo nîşan bidî.
Raybazê komploye
Peynî ke girêdayîşê şarî zî birêz Ocalanî ra vejîyaye werte, dewletê îxanetkar û xayîn raybazê xo yê komploye bedilnay. No xayintîya înan heta tepiştişê birêz Ocalanî verdewam kerd. Wextê birêz Ocalan Ewropa û cayekî gêraynê, bertekê xo bi nêy vatişan ardênê ziwan: “Ser rîyê nê dinyaye zî her kesî rê ca est o, la min re bi weşî herra ke ez bikewa çino.” Birêz Ocalan no bertekî nîşan daynê ke heme hêzê dinyaye bi awayekî miyanê nê komploye de ca gênî. Yanî komplo hende hera bi ke merdim nêşînaynê çend dewlet an zî bi çend hêzan sînor bikero. No ser zî komploya fîzîkî vejîyayişê Kenyaye çîyo ke tesadufî yo.
Bi aweyekî dewletê Afrîkaye zî no komployê de ca girewtî. 18’ê Sibata 2010’an de Sekreterê Partiya Yewîtîya Demokratîk a Neteweyî ya Kenyaye Beht Mukogodo ke muxalîfê îktîdarê Kenyaye yo, seba ke vernîya komploye de nêbîy asteng, şarê kurd ra lêborîna xo waşt. Seba ke birêz Ocalan Kenyaye û no 16 serra ke Îmraliye de hemverê hêzê kapîtalîst xoverdayîşo ke bêmiyan dano bandorê ke muhîm ser muxalefetê Kenyaye viraşto û no semed ra zî lêborîna xo gelê kurd ra waşt.
Kapîtalîstî şaş bî
Bi tepiştişê birêz Ocalanî êdî hêzê kapîtalîstî payîvê şerekî gird bî. Kurdistan, Ewropa û heme cayên ke kurd tede cuyenî no komploye vero çalakîyan viraştî.
Bi taybetî xoverdayîşê birêz Ocalanî ke hemverî komplogeran nîşan da û çalakîyê kurdistanijan wina kerd ke rayedarê Amerîkaye xo ra poşman bibî. Hêzê kapîtalîstî no rewş texmîn nêkerdênê û ne zî bawer kerdê ke şarê kurd hende Rayvêrê xo ra wayir bivejo. La ew girêdyîşê bi birêz Ocalan ser heme hêzê kapîtalîstî mîyanê şaşî de mendî. Ti hêz nêeşkîyaynê verê çalakîyê şarî bigîrî. Heta ke kurdê ke xo rotî propagandaya sîyakerdişê birêz Ocalanî domnaynê, heta ke dijî dewleta tirk hem qada siyasî de û hem zî bi çapemenîya xo de waştênê xoverdayîşê birêz Ocalanî berovajî bikerî û çimê şarî de sîya bikerî. Her çend ke haya şar zî cuyayişê birêz Ocalanî ra çinêbî zî bawerîya şarî heta peynîye bi birêz Ocalanî estbî ke têkoşîn dano û do bido zî. Şarê kurd hemverê kaykeridşê kurdên xoroş û dewleta tirk bî.
Kaykerdiş sernêkewt
Serrên 80’î de faşîstê gird Esat Oktay Yildiran seba xoverdayîşê kadroyê rayverê PKKe bişikno, yeno hetî Şehîd M. Xeyrî Durmuşî û rojnameye nîşanî ey dano û ey ra vano ke: “Ma Apo tepişto, dema nêzdîye de ma ey zî anî hetê şima.” Şehîd Xeyrî bi henekî de bawer keno û ey ra vano ke: “Şima zuran kenî. Serek Apo tena zî bimano, do kerrayan zî rêxistin bikero û bi ser şima de bieşrawo.” Her çend ke Xeyrî Durmuş werte de birêz Ocalan çinêbo se zî hewna zî qet bawerîya xo de gam nêerzeno. Ey weş zano ke birêz Ocalan mîyanê her şert û mercî de no doza înan ver bi serkewtişî meşnêno. Heta ver û heta peynî bawerîya înan bi birêz Ocalanî estbî.
Dema komploye de zî heman bawerî şarê Kurdistanî de zî estbî. Şar zî baş zanaynê ke birêz Ocalan her tim seba şar têkoşîn dano. No semedî ra zî heme kaykerdişê înan hetê birêz Ocalanî reyde zî pûç vejîyaye. Êdî şar ameybî merhaleya ke çîyek nas nêkerdênê. Birêz Ocalan pêvînayîşê verên 6’ê Nîsane 1999’an de waşt ke çalakiyê wişk ê veşnayişî bedenan peynî bibo û ser esasê adirbesta ke 1’ê Êlule de amebî îlankerdiş, bîgîrî. No veng ser carekê çalakiyê wişk vindarnay û adirbest verdewam kerd. No rojê zehmet de zî birêz Ocalan seba vergirewtişê şer gerîya. Birêz Ocalan helwesta xo careke diyin rola xo ya seba çareseriye keykerd.
Ocalan her tim azad o
0 Her çend zanaynê bi fen û fûtan ser ey de zî rayna azadî û gera heqîqetî tawîz nêdaynê. Ser xo zilm û îşkenceya nêy 14 serrên Îmralîye yeno şixulnayiş no ser o. Hêzê kapîtalîstî zî weş zanî ke înan bi qetî birêz Ocalan zerrê nêgirewtê û nêşînaynê bigerî zî.
Hêza xo ci ra gênî
No xoverdayîşê birêz Ocalanî bi serran ke hemverê hêzê kapîtalîst meşîyaynê bîr û baweriye daynê heme hêzê ke no pergalî ra bi gazincî. Înan zî hêdî hêdî hemverê nê pergalê riziyaybî vengê xo berz kerdênê. Xo ser şarê kurd bi serran nê têkoşînî meşnaynê. Zindanan zerîyên azadîye, bi birêz Ocalan re xover daynê. Şervanê azadîye bi şerê bêsêpê neyarî şaşomaşo veraday. Nê tena dijmin heme hêzê kapîtalîst hemberî nê xoverdayişê gerîlaye, şaş mendî. Şarê Kurdistanî welat û teberê welatî her tim ser pay ra bîy. Înan zî hêz û bandorê xoverdayişê birêz Ocalanî vejyena asonî.
Çi beno wa bibo hewna heta diyarker û mifteyê çareserîye birêz Ocalan o. Êdî heme hetan nê raştîye qebûl kenêy.
‘Şima nêeşkenî roja ma tarî bikerî’
Yew şew birêz Abdullah Ocalan xatir embazanê xo ra waşt û Sûrîyeye ra vejya. Mehmet Halit Oral ê Zîndanê Gurgumî de girewte bî û bi şiyara ‘Şima nêeşkenî roja ma tarî bikerî’ de sey Çaran, Zekîye û Semayan bedenê xo eşt adir mîyan. Oral bi adirê bedenê xo waşt ke dormarê birêz Ocalanî de bibî tirs. Dema meşa azadîye de bi seyan kêna û ciwanên Kurdistanî bi adirê bedenê xo dormarê birêz Ocalanî de bî tirsî. Hewna 7 serra hetanî 70 serre her kes vejîyaybî raşteyan û girêdana xo ya bi birêz Ocalanî nîşanî dinyaye day. Tirsê adir û xoverdayişê kurdistanijan hem planê komplogeran xirakerdbî û hem zî çimê înan tersnaybî. Hêzê komploger sey verê nêşînaynê awayo aşkera hêrişê birêz Ocalanî bikerî. Senî ke Şehîd Zîlan mektuba xo de vatê: “Baweriyeke ewqas xurt bi to de est o, no hêzê to merdim ver bî to ra anceno.” Eya no bawerî û hêzê birêz Ocalanî tena şarê Kurdistanî nê, heme şarê Rojhilato Miyanên ver bi ey antbîy. No demo ke birêz Ocalanî bi destê Tirkiyaye ame tepiştiş, welatijê ereb, fars û swb. kurdan reyde bermaynê. No rewş zî Rayverîya birêz Ocalanî nîşan dano.
Komploye de rolê hêzê mîyannetewî
Komploya Mîyannetewî, komployekî zaf gird bî û miyanê çend serrî de ameybî hadrekerdiş, heta ke merdim gam bi gam virazyayîşê komploye bander nebo, nêeşkeno bi awayekî raşt komploye ra bibo verpers û no pûç bikero. Verîya ke birêz Abdullah Ocalan Sûrîyeye ra vejya Dewletê Yewbîyaye ya Amerîkaye (DYA) û NATO keştîyê xo yên şer eşrawitî Deryaya Sipîye û oca de tatbîqeta bi nameyê ‘Dînamîk 98’ viraştî. Her kes zanaynê ke no tatbîqet provaya şerê hemverî Sûrîyeye bî. Rayedarê Tirkîyaye no tatbîqetî de hêz girewtî û bi awayo aşkera Sûrîyeye ra gefan werdê. Rayedarê tirk bi awayekî akerde hemverî Sûrîyeye şer îlan kerdî. Tirkîyaye rewşeke wina ameybî kerdiş ke kewtişê Sûrîyeye ra dem hûmartinî. Ason bi ke Tirkîya paştîya xo bi tatbîqetê ke DYA û NATOya Deryaya Sipîye de viraştinê û xo bi no tatbîqetî ra giredaybî. DYA û NATO bi keştîyê xo yên şerî ameybî heta verê Sûriyeye û bi no tatbîqetî gef Sûrîyeye ra wendênêy. Balkêş o ke Tirkîya verîya ke hemverê Sûrîyeye şer îlan bikero, birêz Ocalanî 1’ê êlule 1998’ê de adirbest îlan kerdbî. Birêz Ocalan no hemleye de planê komplogeran û dewleta Tirkîyaye ya şer vila vet. Hetê kurdan de gefa şerkerdişê meydanî ra nêwariştbî û kurd destê aştîye dergî Tirkîyaye kerdênê. Her tim Tirkîya no şansê aştîye bi gefên şerê miyanên wedarnayo. Hetanê nika DYA û NATO bi awayekî nimite beşdarê şer bibî, na ray zî DYA û NATO bi awayekî aşkera beşdarê şerî bîynê.