Hemleya ke 1ê Hezîran de destpa kerd hetê peynî şina. Roja 69. yê hemle de navendê sûk bi temamî çeteyanê DAIŞ ra ame xelesnayen. La hona tayî tax û noqteyan de dûştê çeteyê ke girotîyay bin ablûqa operasyon rameno. Navendê kultur, Nêweşxaneyê Emel, otel, qewşaxê ewleyî, Postexane, Çarşiyê El-Mûxeta, taxa El-Serab, taxa El-Cura, Mektebê Cotmenî û raya Cerablûs de hona pirodayişî ramenê. Nê cayan de çeteyî sivîlan zey mertal şixulnenê.
Meclîsê Lejkerî ra damûstayinê çapemenî
Fermandarîyê Pêroyî yê Meclîsê Lejkerî yê Minbic vizêr başûrê sûk qewşaxê (xaçerê) El-Beta de damûstayîn day çapemenî. Damûstayîna ke hetê Fermandarê Meclîsî Ebû Emced amê wendin de vajîya ke operasyon bi pêro pêtînya xo rameno. Ebû Emcedî da zonayen ke quwetanê înan heta nika xêlê qezencî vistî dest û wina va: “Raya El-Kura El-Erdiyê û taxê çormeyê ci amey xelesnayen. Bi nayî navendê sûk se ra 90î çeteyan ra ame pakkerden. No zî yeno na mane ke cayê çeteyan zaf teng bîyo.”
Fermandarê Meclîsî Ebû Emcedî da zonayen ke rîwalo ke cayê çeteyan bi teng, sivîlan bakûrê sûk de kenê mertalê ganî û vist vîrî ke sivîlê ke goreyê fermananê înan hereket nêkenê dîrek qetil kenê.
Emcedî da aşkere kerd ke goreyê wezîfedarîya însanî, exlaqî û netewî heta ke pêrokîn sivîlan bixelesnê iyê dê destûr nêdê ke jew çete zî sûk ra bivejyo.
ANHA/MINBIC