Walîtîya Dêrsim nika ra çend rojî ra ver 14 mintiqe qedexe kerdbî û ser no babetî zî nêverdabi ke welatijî dewanê xo ra bivejîy. Hemverê nêy bireya Walîtî bertekêy welatijan domyenî.
Mezraya Mamlesî ya ke girêdayeya dewa Doludîzgîna Pulurî de endamêy keyeya Reyî îxtîmalo ke dewa înan zî bidekewo mîyanê mintiqeya qedexeyî vero dekewtîy grewa vêşanî. Keyeya Reyî ke grewa vêşanî da destpêkerdiş ayvana keyeyê xo ra pankartêy seyî ‘Ma nêwazenîy biagêrî 94’anî, ‘Newe ra vengkerdişê dewan rê ney’, ‘Ma wazenîy dewanê xo de azad bicuyî’ elaqnayî. Wekîla HDP ya Dêrsimî Edîbe Şahîn keyeyî zîyaret kerd.
Wexto zîyaretî de keyeyî ra Duzgun Rey ard ziwan ke dewlet newe ra wazeno qetlîama Dêrsimî bido cuyayîş û wina vat: “Operasyonêy ke newe ra dest pê kerdî, veşîyayîşê daristanan, merdişê merdiman û qedexekerdişê tay mintiqeyan ma dekeno mîyanê tersî. Xora ma bi serran ra pey agêraybî dewanê xo û ma dewêy xo kewe kerdbî. La semeda ke no rojan de rayna bireyek wina girewtiş nîno qebulkerdiş û no sero zî ma grev da destpêkerdiş. Greva ma do 2 rojan ra yew sey dor do bitadîyo.”
Beno ke bireso cayê înan
Wekîla HDP ya Dêrsimî Edîbe Şahîn zî ciresna ke ya heme mintiqeyanê ke amey qedexekerdişî gêraya û wina domna: “Heme mintiqeyan de zî welatijî vanîy ke êy do cayê xo nêteriknî. Merdimêy ke tîya de cuyenîy bi serreyan a ke zilm, surgin û qetlîyamî cuyayî. Beno ke no qedexe siba roj bêro bireso cayê înan zî. Na semed ra heta ke qedexe nêresayo mintiqeya înan, nêy keyeyî grew dayo destpêkerdiş. Nêy welatijê ma wazenîy rayna xuzir serwer bibo û muzakere dest pê bikero.” Qalîkerdişan ra dima Şahîn welatijanê dewa Elqajîyî zîyaret kerd û dima zî qezayî ra vecyay.
DÎHA / DERSİM