Hemserokê HDP Selahattîn Demîrtaşî karî ra dûrvistişê bi hezaran emegdaranê perwerde zey operasyonê tesfiyekerdişî biname kerd û veng da malim û malbatan ke dûştê polîtîkayanê tesfiye yê AKP modela alternatîf yê perwerdeyî ronê.
Demîrtaş ke karî ra dûrvistişê maliman rê nêrazîbîyen damûsna û aşkere kerd ke malimê muxalîf qada cemawarî (kamû) ra yenê tesfîyekerdiş. Selahattîn Demîrtaşî vist vîrî ke dûştê pêro leteyanê qomî êrişeke esto û da zonayen ke ewilî malim û pêro gurekarî na pela êrişan ra nesîbê xo gênê. Demîrtaşî aşkere kerd ke beno ke hemverê gurekaranê weşî zî operasyon virazîyo.
‘AKP yê ke bîat nêkenê tesfiye kena’
Hemserokê HDP Demîrtaşî dîyar kerd ke AKP dewlet zey keyeyê xo vînena, kesê ke bîatê ci nêkenê zey dişmen,tehdîd û terorîst hesibnena û wazena dewlet ra tesfîye bikero. Dûştê polîtîkayanê tesfiyekerdişî Selahattîn Demîrtaşî hayr ant rolê berzkerdişê tekoşîn ser û wina va: “Tekoşîneke tenya seba ageyrayişê ser kar yê maliman bes nîyo. Raşt o, na dewlet malê AKP nîya. Ganî bibo xîzmetkarê pêrokîn welatijan.Heta nika Komara Tirkîye nêbî malê kurdan, na raştîyekê ya, çiyekê newe vejyaya werte nîya.”
Demîrtaşî vist vîrî ke ronayişê komarî ra heta nika roşnbîrê kurd, siyasetmedarê ke heqê kurdan seveknenê ya ameyê îdamkerden, ya zî sirgûn bîyê û va bi no şiklî dewlet ra ameyê tesfîyekerden.
‘Modela alternatîf’
Selahattîn Demîrtaş ard zon ke bi hewcedarîyê ke polîtîkaya alternatîf bîro ronayen ra rîbirî yê û wina dewam kerd: “Teybetî gurekar ganî têkoşîna sendîkayan
vilayê pêrokîn civakî bikerê û nayî tenya ser ageyrayişê karê xo nêvînê. Eke bi raştîmalim karî ra yenê eştiş, ganî domanê kurd zî damûsnê ke mecbûrê no perwerdeyo ke yeno ferz kerdiş nîyê. Tîya de wezîfe tenya yê maliman nîyo, bar kewno ser malbat û wendekaran zî. Ganî wayîrê malim û îradeyê xo bivejyê, perwerdeya alternatîf, navêndê alternatîf ronê û vajê ma mecbûrê mektebanê dewlet nîyê. Hewce bo ganî her keyeyî açarnê navendê perwerde. Hîrê kesan ra, panc kesan, des kesan ra polan akerê û perwerdeyê alternatîf ya bi ziwanê mayî bidê.” Demîrtaşî pêşnîyaz kerd ke no sîstemê perwerdeyê alternatîf her cayê civakî de, tax û kuçeyan de, heta dewan vila bikerê.
Domanê xo berê navendê alternatîfî
Hemserokê HDP Selahattîn Demîrtaşî aşkere kerd ke ganî modela alternatîf ganî bi fonan bîro fînansekerdiş û wina va: “Malimê ke karî ra amey eştiş ganî bi rihê poştdayenî bîrê pêhet, fonekê virazê û bi no rengî şenê debara xo bikerê, alternatîfeke ke bişerê xo fînanse bikerê ronê.”
Demîrtaşî herzewbîn veng da malbatan zî û va: “Malbatê ke xo mecbûr nêmanenê domanê xo birişê mekteban wa domanê xo biberê navendê alternatîf, mesrefê nê kursan zî fona wertex ra êşkîneya bîro dayen. Êşkîyeno teqez modelê perwerdeyê alternatîf bîro ronayen.” Demîrtaşî ard ser zon ke polîtîkayê êrîşkar ê AKP bi hemleyanê na rengî êşkenê bîrê ravêrnayen û aşkere kerd ke sendîkayî zî êşkenê hemleyê winayîn bikerê.
DÎHA / ENQERA