Mektebê Seretayî yê Ferzad Kemanger, bi ‘Statuyê Mektebê Taybet’ de 2014î de bi heyecaneke gird qezaya Amed Rêzan de destpa perwerdeyê kurdî kerd. Û no 3 serrîyo bi kurdî perwerde da. Mektebî de 238 wendekaran bi ziwandê xo de dest girotî. Mektebê Seretayî yê Ferzad Kemanger heta nika 4 reynî hetê dewlet amebi morkerdiş. La netîceyê tekoşîn û nêrazîbîyayişanê şar û maliman de morê qedexe amey şikinayen.
238 wendekarî estbî
Mektebî de 5 pol û 110 wendekaran dest pa perwerdeyê bi kurdî kerdî. Mektebî de 64 wendekarê keyney, 46ê ci zî lajekî bî. Nê 110 wendekaran ra 20ê ci domanê Kobanê, yê ke êrişanê çeteyanê DAIŞ ra remyay û şî Amed bî. Bado ke Kobanê xelesya 20 wendekarî ageyray hardê xo. Serra sifteyin ra tepya homar bî vêşêr (jêde). Emserr, ya ke serra 3. yê wendişî de homara wendekaran resya 238an. Pola vermektebî de 38 wendekar, pola yewîn de 70 wendekarî, pola diyîn de 70 wendekarî û pola hîreyîn de 60 wendekarî mektebî de perwerde vînenê. Mektebê Seretayî yê Ferzad Kemanger de 18 malimû wezîfedar ê û 238 wendekaran rê perwerde danê. Wendekarî nika akerdişê mektebî pawenê.
Serkewtişê wendekaran ra tersay
Goreyê hayderîyê ke malimanê mektebî day, wendekarê înan zaf jîr bî û her hetî ra avey şî. Maliman vistî vîr ke wendekarê mektebê înan, wendekaranê mektebanê sîstemî ra jîrtir û serkewt bî. Malimanê mektebî ra Jana Çelîk ke derheqê morkerdişê mektebî de qisey kerd û qerarî rê nêrazîbîyen damûsna.
Çelîk diyar kerd ke no 3 serrîyo ke a mektebî de malimtî kena û dema newî yê perwerde de dersa pola hîrêyîn dana. Çelîk ard ziwan ke mektebê înan bi hewayeke bêrehm ame morkerdiş û wina dewam kerd: “Wexto ke ma hesna ke mektebê ma ameyo morkerdiş, raştî zî hêrseke gird zerya ma de ciwîya. Senî ke dewlet dûştê Zarok TV bêtehamulîya xo damûsna, nika zî hemverê mektebî de rîreşîya xo damûsna.”
Zorvajî dûştê ziwandê kurdî yo
Jana Çelîk aşkere kerd ke zey maliman ê nayî qebûl nêkenê û vist vîrî ke, wextê akerdişê mektebî de zî mektebê înan 4 reynî ame morkerdiş. Çelîk da zonayen ke şar wazeno ke domanê înan bi ziwandê kurdî perwerde bivînê û wina dewam kerd: “Bi desan serrîyo ke dewlet wazena ziwanê mayî çinî bikero. Bi desan serrîyo na morkerdiş zî zext û zorvajîyê dewlet dûştê ziwandê kurdî yo.”
Morê dewlet nêsilasneme
Malima Mektebê Seretayî yê Ferzad Kemanger Jana Çelîk da zonayen ke ê girotişê mekteban goşdarî nêkenê û dê karê xo binamnê. Çelîk dîyar kerd ke ê bê alternatîf nîyê û wina dewam kerd: “Perwerde do dewam bikero. Eke mektebê ma nêabê, ma dê perwerdeyîya xo keyeyan de bidê. Tenya mektebî nêamey morkerdiş, eynî wextî de ziwanê şarê kurd zî ame morkerdiş.”
Çelîk da zonayen ke iyê dê morê dewlet nêsilasnê û polîtîkaya dewlet ya zey Zangeha kurdî û TRT6 vist vîrî û va, iyê dê bi nê polîtîkayan nêxapînê. Çelîk da zonayen ke iyê dê goreyê sîstema xo ya perwerde ziwanê kurdî bidê. Jana Çelîk verikîn veng da şarê Amed û pêrokîn şarê kurd ke wayîrê ziwan û mektebanê xo bivejyê û waşt ke şar dûştê na morkerdişî bêveng nêmano. n DÎHA/AMED