Parlamenterê HDPyî yê Îzmîrî Mûrat Çepnîyî vera tehdîdanê AKPyî yê Rojawanî ser o de reaksîyon nîşan da û dîyar kerd ke operasyonêko winasî do bêro manaya xelisnayîşê DAÎŞî. Çepnîyî wina va: “Çimkî DAÎŞ hetê hêzê şarê Rojawanî ra ame pakkerdene. Wina kenî ke herême de bi destekê emperyalîzmî kehenperestan ganî bikerî.”

SEVDA AYDIN MA / ÎZMÎR

Îqtîdarê AKPyî demêko derg o ke îzehet dano ke ê do mudaxaleyê Vakur û Rojhelatê Sûrîye bikerî. Reyna mabênê Amerîka û Tirkîya de derheqê awanbîyayîşê ‘Herêma Biewle’ de tayê mutabakatî virazîyayî.

Parlamenterê HDPyî yê Îzmîrî Mûrat Çepnîyî derheqê tehdîd û mutabakatê Tirkîya û Amerîka de qisey kerd. Çepnîyî dîyar kerd ke hukmat nêşêno welat îdare bikero û hewl dano bi hêrişkerdişê Rojawanî na rewşe derbaz bikero.

Çepnîyî da zanayene ke ewro krîzê ekonomîke hîna kûr bîyo, rewşa akademîsyenan giranêr bîya, bêkarî zêde bîyo û kedkarî raştê neheqîyanê girdan yenî û wina dewam kerd: “Labelê îqtîdar nê probleman reyde eleqeder nêbeno, çepê ci de polîtîkayanê ewleyîyan zêdneno. Koalîsyonoê AKP û MHPyî hêrişanê faşîstan hîna zêde kûr keno. Îqtîdar hewl dano krîzê îdareyî bi hêrişan derbas bikero.”

AKP teng de bimano, operasyonêk plan keno

Çepnîyî qiseykerdişê xo de bale ante muhîmîya Rojawanî ser û wina va: “Rojawan heme dinya de wayîrê cayêkê taybetin o. Ewja de modelêko ke ekolojîk, demokratîk û azadîya cinîyan esas gêno, yeno ronayene. Labelê no model hertim raştê gef û tehdîdanê dewleta Tirkî yeno. Dewleta Tirkî bi dagîrkerdişî tehdît kena. AKP kamcîn wext teng de bimano, operasyonêk plan keno. Ge-ge bi erşawitişê leşkeran, ge-ge zî bi kerdişê operasyonêko fîîlî nêyî keno.”

Nê operasyonê xelisnayîşê DAÎŞî yî

Çepnîyî dewamê qiseykerdişê xo de qala israrê AKPyî yê şerî kerde û wina va: “AKP xo dekeno şerî mîyan. Şarê Kurdîstan û Tirkîya zî kiranceno mîyanê şerî. AKP hewl dano nakokîya Amerîka û Rûsya ra feyde bigîro û ewja de estena xo mende bikero. Nê operasyonê xelisnayîşê DAÎŞî yî. Çimkî DAÎŞ hetê hêzê şarê Rojawanî û hêzê azadîya cinîyan ra ame pakkerdene. Wina kenî ke herême de bi destekê emperyalîzmî kehenperestan ganî bikerî. Cok ra ma vanî ke çîyêk nêbeno sebebê nê operasyonanê leşkerîyan û sîyasetê hêrişkarîya vera şorişê Rojawanî de.”

Ganî herkes vera şerî de bibo yew

Çepnîyî dîyar kerde ke mehneyê ke hetê AKPyî ra yenî nîşandayene raşt nîyî û wina va: “Hêrişê ke bingehê ci yê huqûqî çinêbî, benî sucê merdimîye. Tirkîya dîyar kena ke ‘ewja ra ma rê tehdîdî estî’. Rojhelato Mîyanên bîyo gola gonîye labelê cografyaya Rojawanî bîya modelê pîyacuyayîşê Tirk Kurd, Elewî, Ereb û Êzidîyan. Cok ra ewja de modelo ke heme dinya rê bîyo nimune esto. Raştîya xo de Tirkîya wazena vernîya nê modelî bigîra, cok ra tehdît kena. Cok ra ganî herkes vera şerî de îtîraz bikero. HDP hewl dano goreyê na tabloye çareserîye bîyaro. Reyna HDP hewl dano vera xetimîyayîşê kapîtalîzmî, krîzê şer û dagîrkerîya Rojhelatê Mîyanênî de têkoşînê kede û azadîye bido.”

Dewlete hewl dana vernîya HDPyî bigîra

Çepnîyî peynîya qiseykerdişê xo de bale ante astengkerdişanê dewlete ser û wina va: “Dewlete hewl dana vernîya HDPyî bigîra. Ewro seba ke vernîya qanûnê bingeyî yê demokratîke û îttîfaqo demokratîke bêro girewtene, Rojawan bi dagîrkerdişî yeno tehdîtkerdene. Nêwazenî ke HDP mîyanê nê krîz û kaosî de rolê xo kay bikero. Dewletê emperyalî hewl danî estena xo bipawî, cok ra seba şerî veng danî, partîyanê bînan danî aver û bi no qeyde dengeyanê xo newe ra awan bikerî. Cok ra HDP zî hewl dano sey temsîlkaranê bindestan xo bipawo.”