Wezîrîya Perwerdeyî seba programê perwerdeyî yê emserênî mufredatêko newe eşt dewre. Goreyê nê mufredatî xeylê babetê sey evrîm û sewbîna mufredat ra ameyî vetiş û mefhûmê sey cîhad û sewbîna zî mufredat de ameyî zêdekerdiş.
Babete ser o wendekarê ke bajarê Amedî de cuyenî, qisey kerdî û reaksîyon nîşan dayî.
Wendekaran ra Songul Ataşe qiseykerdişê xo de ayetêkî Quranî finak nîşan daye û wina va: “Quran de yeno vatiş ke ‘eke şima wazenî mi bivînî, asmên û astareyan ra biewnênê’. Çimkî ilm seba dînî asteng nîyo. Mufredat ra vetişê evrîmî raşt nîyo. Herçiqas bêro astengkerdiş zî do bêro musayîş.”
Ganî mufredatêko ortax bibo
Çîgdem Aydine zî va ‘Tirkîya de nufûsêko kozmopolît esto’ û wina domnaye: “Nê bedilîyayîşî bawerîyanê bînan rê nêbeno cewab. Xîtabê herkesî nêkeno. Lazimîya Tirkîya bi ilmê cinîye esta û ganî mufredatêko ortax bibo.”
Zeynep Yildize zî dîyar kerde ke ezmûnê ke yenî viraştiş de aseno ke Tirkîya zaf tepîya menda û wina va: “Her serre mufredat û sîstemê perwerdeyî yeno bedilnayîş û no zî merdiman ser de tesîrêko xirab virazeno.”
Tewr peynî Zelal Aktaşa ke Unîversîteya Hacettepe de wanena, vera bedilnayîşê mufredatî de reaksîyon nîşan daye û va ‘ez wazena ke huner û ilmî reyde eleqeder biba.”
AMED