Endamê Desteya Bilind a Kurd (DBK) û Hevserokê Giştî yê Partiya Yekitiya Demokratîk (PYD) Salih Muslim li Hewlêrê bi rêveberên YNK’ê re hevdîtinek pêk anî. Hevdîtin û serdanên Hevserokê Giştî yê PYD û Endamê DBK’ê Salih Muslim li Başûrê Kurdistanê berdewam dikin. Salih doh li Hewlêrê bi endamên Polutburoya YNK’ê Kusret Resûl, Berhem Salih, Edanan Muftî, Rifat Ebdullah û Arez Ebdullah re hevdîtinek pêk anî. Hevdîtin saet bi qasî saetekê berdewam kir.

Hat diyarkirin ku hevdîtin bi awayeke erênî derbas bûye û di hevdîtinê de mijara deriyê sînor ê di navbera Başûr û Rojavayê Kurdistanê de ku demek dirêj e tê gotin ku wê vebe, lê heta niha venebûye de nîqaş hate kirin. Muslim derbarê hevdîtinê de daxuyaniyek kurt da û da zanîn ku wana derbarê mijarê de bi Hukûmeta Herêmê re li hev kirine, lê ji ber hin pirsgirêkên teknîkî heta niha derî nehatiye vekirin. Her wiha, Muslim da zanîn ku di hevdîtinê de bi awayeke giştî rewşa Rojavayê Kurdistanê û Sûriyeyê hatiye gotûbêjkirin. 

HEWLÊR