Endama Desteya Bilind a Kurd Îlham Ehmet, li hemberî biryara wezîrên karên derve yên Yekîtiya Ewropayê (YE), ku destûrê dide Koalîsyona Niştimanî ya Hêzên Muxalefeta Sûriyê da ku petrolê bifiroşe û bi destûra muxalefetê şîrketên petrolê razemeniyê bikin, nerazîbûn nîşan da. Endama Desteya Bilind a Kurd Îlham Ehmed, der barê biryara YE’yê ku çend roj beriya niha hatibû girtin de, ji ANHA’yê re axivî. Ehmed destnîşan kir ger ku firotina petrolê feydeyekê bide gelên Sûriyê û hemû pêkhateyên wê, ev dê bibe tiştekî baş û wê ambargoyê rake. Ehmed, da zanîn ku, dema li biryara YE’yê dinêrin, tenê Koalîsyona Niştimanî ya Hêzên Muxalefeta Sûriyê muxatap hatiye girtin, lê nava koalîsyonê de hemû pêkhateyên Sûriyê nîn in û wiha dirêjî da axaftina xwe: “Beşek girîng li derve mane, Desteya Bilind a Kurd ji yek ji van e. Ji ber vê sedemê Koalîsyona Muxalefeta Sûriyê nikare nûnertiya hemû pêkhateyên Sûriyê bike.”


'Armanc bîrên petrolê ne'
Îlham Ehmed, li hemberî YE’yê jî nerazîbûn nîşan da û ev tişt gotin: “Têkiliyên Yekîtiya Ewropayê divê li ser esasê bazirganiyê nebe. Beriya her tiştî divê Yekîtiya Ewropayê ji bo yekîtiya muxalefetê û rawestandina xwînrijandinê kar bike.”
Ehmed, anî ziman ku heke koalîsyona muxalefetê jî bixwaze nûnertiya hemû gelên Sûriyê bike, divê bi Desteya Bilind a Kurd re rûne û guftugoyan bike. Ehmed bal kişand ku piraniya herêmên Kurdî û bi taybetî herêmên petrolê dibin kontrola Desteya Bilind de, lewre ger ku firotina petrolê çêbibe, pêwîste ev riya Desteya Bilind çêbibe û wiha dom kiri: “Firotina petrolê jî divê ji bo başkirina rewşa aborî ya Sûriyê û Rojavayê Kurdistanê û vegera koçberan bê bikaranîn.”
Liser hewldanên komên çekdar ku dixwazin bîrên petrolê bidest bixin jî Ehmed wiha got: “Armanca komên girêdayî Cephet El-Nasra û yên din desteserkirina bîrên petrolê ye. Lê herêma Rojavayê Kurdistanê niha di bin parastina gel de ye û tu kes nikare destkeftiyên gel ji wan bigire. Hemû berhemên petrolê jî divê xizmeta gelên Sûriyê de bin.”

ANHA/QAMIŞLO