Peynî de ant masey ser. Mutabakatê 28’ê sibata 2015 de Qesrê Dolmabahçeye zî, peynîyê fedakarînê gird ê Ocalanî bi. Labelê senî ke, Erdoganî fam kerd weçînayinî de rayê AKPe benê kemî, zey verî manewra kerd.
Ey vat qey, kurdê hetanî o çax paştî dayo ci, çi bikiro, iyê paştî bikirê. O yo bi manewraya rayanê nijadperestan bigiro û fina AKPe bi serê xo bibo îqtîdar. La belê kurdan hinî îlalah kerd. AKPe ra kewtî dûrî û 7’ê hezîrane de HDP het ca girot. Bi weçînayinê 7’ê hezîrane AKP îqtîdar ra ardî war û dersa tarîxî dayê ci.
***
Erdogan û AKPe hetanî nika ra ders nêgirot, ancî omidê xo bi lej ra girêda. Vat senîbo, hinî artêş û polîs kewtê binê kontrolê înan. Gerîlayê zî vera DAIŞe lej kenê. Bi çend hêrişanê hewayîn û operasyonanê lejker û polîsan, bişînbo însiyatîfî bigiro dest.
La belê hesab ancî şaş vejiya. 24’ê temmuze ra na kişt, performansê lej ê gerîlayan dî. Şarê Tirkiyeye zî hinî lejî zey lejê îqtîdarîn ê Erdoganî vînenê. Hinî merdimê lejker û polîsê kişiyenê zî, vengê xo kenê berz.
O adirê lejiyo ki, wekerd hinî Erdogan û AKP veşneno. Coka verî serqorucî vistî dewre. Nêbi. Înan pey ra saziyê mehmedok/sivîlî vistî dewre. Waşt bi nameyê 645 saziyanê Amedî rey mîtîng virazê. Feqet mîtîng açariya fîyaskoye. Mîtîngê nameyê 645 saziyan ser, bi beşdarbîyîşê nezdiyê 100 kesan viraziya.
***
Eynî wext de, heme îmkanê dewletî vistî dewre û bi heveyê saziyan Enqere de mîtîng organîze kerd.
Her çiqas vanê saziyê sivîl rayverîna mîtînganê vera PKKe kenê zî, rastî de organîzatorê ê mîtîngan Erdogan o.
Bi ê mîtîngan wazeno verê reaksiyonan açarno cayanê bînan. Kişta bîn ra dost û mutefîkanê xo zî fînenê dewre. Çiyê ki bi raya artêş û polîsan nêşenê, wazenê bi destê heveyê çoşmana bikirê. Vengdayişanê qandê adirbirnayinî pey de, Erdogan û AKP estê. Ê wazenê zey hetanî nika, PKK adirbirnayinê jew-hetin îlan bikiro. Bado vejiyê vajê, “Ma bi operasyonanê hewayîna paştiya PKKe şikinê. PKK mecbûrê adirbirnayinî mend”.
Labelê PKK vera enê siyasetê Erdogan û AKPe hamle kerd. PKK vano: “Hinî adirbirnayinê jew hetin nêbeno. Eki bibo zî, gerek adirbirnayinê 2 hetin û tehkîmkerde bo”.
Bi vatenanê rayveranê PKKe û eşkerekerdişê KCKe yê 16’ê êlule, hinî top kewtê destê Erdogan û AKPe. Eki bi rastî adirbirnayin wazenê, şert “Adirbirnayinê 2 hetin û tehkîmkerde” yo.
Eki dost û mutefîkê dewleta tirk zî bi rastî adirbirnayin wazenê, muxatabê înan hinî PKK niyo, Erdogan û dewleta tirk a.