OZGUR PAKSOY / MEHMET ŞAH ORUÇ / MA / AMED
Dewleta tirkî 27ê Gulane de bi nameyê ‘Operasyonê Pençe’ de dest bi hêrişê Başûrê Kurdîstanî kerd û hêrişî ewro zî dewam kenî. 27 rojî yo ke dewleta Tirkî Başûrê Kurdîstanî ser o bombeyan varnena û pêrodayîşî dewam kenî. Vera hêrişan de reaksîyonî her ke şono zêde benî.
Parlamenterê HDPyî yê Amedî Îmam Taşçierî bêvengîya Îdareyê Herêma Kurdîstanî û hukmatê Îraqî rexne kerd. Taşçierî va ‘dewleta Tirkî 25 serrî yo ke hêrişan domnena’ û wina domna: “Labelê nê operasyonan ra qet netîce nêgirewto. Na zî sey Efrînî dagîrkerî ya. Hewl danî herême bigîrî binê kontrolê xo. Ganî şarê Başûrî, Îdareyê Herêma Kurdîstanî, partîyê sîyasîyî û hetê bînî tewirê xo nîşan bidî.”
Taşçierî awanbîyayîşê Komara Mehabadî de rolê Mele Mistefa Barzanîyî ser o vindet û wina va: “Meheabad Rojhelat de bi, labelê Mele Mistefa ewja de bi. Ganî ma zî ewro dagîrkerîye qebul nêkerî. No meseleyê partîyêk nîyo, meseleyê Kurdîstanî yo. Cok ra tewirê heme Kurdan muhîm o. Neçîrvan Barzanî demkî polîtîkayan domneno û no zî zirar dano menfîetanê Kurdan. Ganî menfîetê heme Kurdan bêrî esasgirewtene. Wexto ke DAÎŞî hêrişê Kerkûkî kerd, PKK vera hêrişan de vindet. Çimkî no problemêko neteweyî yo.”
Problemo esasî yewîya neteweyî ya
Taşçierî va ‘polîtîkayê Barzanîyî do bibê sebebê şerê Birakiştişî’ û wina qedêna: “Verê cu Başûr de mabênê PDK û YNK de Birakiştiş qewimîyabi û bi hezaran pêşmergeyî merdbî. No raşt nîyo, ganî ma vera nêyî de bivinderî. Problemo esasî yê kurdan yewîya neteweyî ya Kurdan a. Eke Kongreya Neteweyî biameyêne viraştene, ewro wina nêbîyêne. Cok ra ganî vera dagîrkerîye de tewirê neteweyî bêro nîşandayene. Heta nika ganî Barzanîyî qîyamet biqerfnayêne. Labelê bêveng maneno. Na bêvengîye nîna qebulkerdene.”