Teşebusê derbe ra dima çarçeweya rewşa îstînayî (OHAL) de Qerarnameyê Hukmê Qanûnî (KHK) xeylê Şaredarîyanê DBPyî rê qayûmî amebî tayînkerdiş. Nê qayûman zî bi karî ra vistişê xebatkaran û wedarnayîşê tabelayanê kurdî yê şaredarîyan dest bi kar kerdbî.
Şaredarîyê DBPyî ke bi xebatanê zaf ziwanî esas gênî û bi no hawa kar kenî, hemînan de zî tabelayê şaredarîyan benî hedefê qayûman.
Nê şaredarîyan ra yewe zî Şaredarîya Rayîrê Îpegî yê Wanî ya.
Tabeleya Parka Cinîyan ya Şengalî ke girêdayeyê Şaredarîya Rayîrê Îpegî ya de nameyê ‘Şengal’î hetê qayûmî ra bi bantêk ame padayîş. Ame musayîş ke talîmatê wedarnayîşî hetê Hetkarê Walîyî Onder Cano ke sey qayûmî tayîn bîyo ra ameyo dayîş.
Şaredarîya de Rayîrê Îpegî de Mudurîya Park û Bexçeyan ra keso ke waşt nameyê ci aşkere nêbo, qebul kerd ke nameyê ‘Şengal’î hetê înan ra ameyo padayîş û wina va: “Qerarê Meclîsê Şaredarî seba Şengal nê, seba Berîvane ameyo girewtiş. Ma zî serê ci pada, labelê do nameyê bibo çi, no derheq de destê ma de ti nuşteyo fermî çin o.”
DÎHABER/WAN