Qeleya xoverdayiş, sembola serbestî û omidî.
Hêlika şoreşanê newî, istanika domanan, destana se serran.
Tersa padîşah û dîktatoran; Kobanê...
Gam û toximê sifte yê şoreşa 19’ê Temmuz 2012’î yê Rojawa Kobanê de erziya. Peycoy no vayê şoreş pel û pel vilayê pêrokîn sûk, qeza û dewanê bîn bi. Kobanê çina-kincê AYN El Arap ke hetê zaliman bi zorvajî kerdî ci dirit û eşt.
Badê xoverdayişê do tarixî Kobanêyijan ala xo banê berzî ra hewada û mijdaniya Kurdistan’a azad û xoser da. Kobanê zey kanton aşma Çile yê 2014’î de xosereya xo îlan kerd. Pey coy, Efrîn û Cizîr. Endî Rojawa de mîladê do newî destci kerd. Serva pêrokîn Suriye vinderdişê Rojawa bi solix, gan û rih dî. Rayê tren yê ke serxet û binxet de roniyay bî, hetê şoreş û azadî ray girotî. Dîktatorê ke vinderdişa Kobanê ra tersiyay her roj hêrişê xo kerdî jêde. Hesabê fetisnayişê şoreşî kerdî. 2014’î de nê hêrişî bî xorîn.
La qûwetanê pawitenê şarî YPG-YPJ bi xoverdayiş, îrade û cesaretê do gird pawitişê şarî û harda xo girotî û destan niwîsnay. Rixmê tanq û topan, tifinganê giran dişmenê minafiq Kobanê ra peyser amey eştiş. 15’ê Îlonî de çeteyê ke rî, rih û alê ci yê siya yê ke dîktator erdoğan’î ra ferman girotî, fina-onca verê xo day hetê Kobanê û girotî bin çember. Erdoğan Enqera de kewt zerreyê qesra xo û ewja de kewtişê Kobanê pawit. Û waşt veriya herkesî ‘mijdaniya kewtişê’ Kobanê bido.
Doştê nê hewildayinan keyney û gencanê Kurdan bedenê xo kerdî bombe û nêviraday ke tanq û topê zaliman ravêrê. Bi seyan gencanê Kurd, sosyalîst û azadîwaşt zî verê xo day hetê Kobanê, sînoran ravêrnay û bi slogana ‘ya serkewtiş ya merdiş’ tewrê xoverdayişa tarixî bî. Vakûrê Kurdistan de zî 6-8’ê cotmeng de Kurdistanijî û dostê ci vejyay meydanan û wayrê xoverdayişa tarixî vejyay. Badê destana 134 rojan, 26’ê Çile 2015’î de Kobanê çeteyanê rî siya ra ame xelesnayen û şiyayişê tarix vurniya.
Goreyê taynî kesan Kobanê; Guarnika, Stalîngirat û Verdun a se serra 21. a. La jû raştî esta; Kobanê pêrokîn dinya rê damisna ke azadî bi xoverdayiş yena giroten.
Wexto ke behsê Kobanê yeno kerdin, helbet ceniyê Kurd yenê vîrî. Şexs dê Arîn Mîrkan’an de ceniyanê Kurd xoverdayişê Kobanê rê pêşengey kerdî. Endî Kobanê jû dewê da werdî-qijkek niya, jû sûkê da tarixî ya ke hetê pêrokîn dinya yena silasnayen. Nayî ra, bi seyan siyasetmedar, roşnbîr û akademîsyenê zey Esguivel, Desmond Tutu, Noam Chomsky 1’ê Mijdar zey ‘Roja dinya yê Kobanê’ îlan kerd. Û ser na vengdayiş 1’ê Mijdar’î de 40 welat û 100 ra vêşî sûkan de bi seyan kesî vejyay meydanan û xoverdayişa Kobanê silamî kerdî. Awrûpa ra heta Amerîqa, Asya ra heta Afrîqa, rojhelata miyanî ra heta Avusturalya herkesî vatî ‘Kobanê rimeta ma ya’.
Kobanê endî tenya Kobanê niyo..!
Kobanê endî Şengal o, Kerkuk o.
Kobanê endî Amed o, Mehabat o.
Kobanê endî Cizîra Botan o, Lîce yo, Farqîn o.
Kobanê endî Kurdistan a azad o.