Ceniyê ke kuçeyê Sanat yê Dersim de are bî, Cizîr de teşîrkerdişê bedenê ceniyan protesto kerd. Hemseroka DBP yê sûk Gulseven Yildiz qisey kerd û vist vîrî ke polîtîkayê zihnîyetê qirkerdin bi hikûmeta AKP ra piya hona jêde xorîn bî û resyay merhaleyê bêexlaqî. Yildiz veng da kesê ke Kurdan rê xo kenê ker, kor û lal û va, ‘bi teşîrkerdişê bedenê ma şima nêşkenê adirê zerya ma bitefînê. Viraniya ma rumeta ma, bêrûmetîna şima ya.
Kiltûrê tecawuz rameno
Colemerg de zî aktivîstê KJA ver bana DBP yê sûk de amey pêhet. Hemseroka Şûbeyê Kurdî-Der Neslîhan Kaynak damustayin da û vist vîrî ke cenî dê bi xoverdayiş cewab bidê qetlîamanê dewlet. Sêrt de zî ceniyê ke ver bana HDP yê sûk de are bî teşîrkerdişê bedenê ceniyan protesto kerdî. Gurekara Navendê Paştdayen yê Ceniyan Berfîn Şazîye Sevîlgen qiseyk erd û vist vîrî ke di aşmiyo Cizîr de binlingkerdişê heqan bê sînor ramenê û herkes nay rê şahîdî keno. Sevîlgen da zonayen ke, veşnayiş, letekerdiş û cikerdişê bedenê însanan merhaleyê wehşetî rafînenê ver çiman. Badê damustayin ceniyan 5 deqe nûmayişê ronişten viraştî.
Hewl danê zey Hîtler’î bikerê
Ceniyanê Dîlokijî zî biyayiş rê nêrazîbiyen mojnay û vatî ke ê ke xo ra vanê ‘ez merdim a’ ganî na wehşet qebûl nêkerî. Hemseroka HDP yê Dîlok Atîye Okay ciresna ke Tirkîye Fîlîpînan de mabênê gerîllayê Moro û hikûmatî de rolê mabênkarî kay kena, la verba kurdan qetlîam virazena. Hemseroka HDP ê qezaya Şehîtkamîlî Siddika Yaman zî ard ziwan ke lejekê dûştê merdimatî yeno ramiten. Yaman vist vîrî ke, dinya de nimûneyê bîn yê no lejî çinyo û wina qisey kerd: “Hewl danî ke sey Hîtlerî bikerî. Merdimî mehkûmê merdişî kenê û kişenî, bado zî bi benzînî veşnenî. Hiquqê merdimatî de cayê na wehşet çinyo. Hemseroka DBP ê Dîlok Demet Paksoy zî dîyar kerd ke Cizîr de merdimî nêmerdî, wijdanê merdimatî merd.
DÎHA/NAVENDÊ XEBERAN