Weçînayîşê 24ê Hezîrane rê 5 rojî mendî û Partîya Demokratîke ya Şaran (HDP) lez daya xebatanê xo. Namzed û îdarekarê HDPyî xeylê bajar, qeza, taxe û dewan de xebatanê tewir bi tewiran hewl dana xo biresna heme cayan.
Çarçewaya xebatan de sere de Amed, Edene, Dîlok, Riha, Îzmîr, Denîzlî, Sêrt, Stenbol û sewbîna cayan de xebatî ameyî domnayîş. Namzed û xebatkaranê HDPyî bi mîtînge, zîyaretê esnaf û keyeyan, şayî, akerdişê buroyê weçînayîşî, kombîyayîşê şarî û sewbîna cîya cîya xebatan şarî reyde ameyî têhet. Şar eleqeyêko gird nîşanê namzedan da. Qiseykerdişan de seba 24ê Hezîrane destek ameyî waştiş û qetlîyamê Pirsusî ame lanetkerdiş.
Bitaybetî Stenbol de bi beşdarbîyayîşê bi deshezaran kesan mîtîngêka girde ameye viraştiş. Na mîtînge de siloganê ‘Bicuye Rayber Apo’ ameyî eştiş û şar bi coşêko gird beşdarê mîtînge bîyî. Heto bîn ra qezayanê Amedî de seba mîtînga merkezî ya Amedî ke do siba bêro viraştiş, veng dîya şarî.
Yew raye heme çî bedilnena
Heto bîn ra raydayîşê Almanya zî ewro qedîyeno. Cok ra NAV-DEMî îzehetêk dayo û wina vato: “Ewro Almanya de raydayîş qedîyeno. Cok ra yê ke heta nika raya xo bikar nîyarda, wa bikar bîyaro. Wa herkes bi ruhê seferberî şêrî sindoqan. AKP hewl dana HDP binê bendê weçînayîşî de biverdo. Ma weçînayîşê 7ê Hezîrane de dî ke rayê teberê welatî zaf muhîm î. Seke namzedê ma Selahattîn Demîrtaşî zî va ‘qasê yew sîla emrê nê dîktatorî mendo’ û ganî ma zî sîlayêk pirodî. Wa şarê ma xo vîra nêkero, yew raye heme çî bedilnena.”
MERKEZÊ XEBERAN