Hemşaredara Dersim Nûrhayat Altûn, parlementerê HDP yê Dersim Alîcan Onlu ra pîya Quwetê Ked û Demokrasî ke kuçeyê Sanatî de amey pêhet bîyayîşanê peynî yê Tirkîye rê nêrazîbîyen damûsnay.
‘Dûştê faşîzmî doş bi doş’
Nûmayişkarê ke panqarta ‘Ne derbeya lejkerî ne zî dîktatorîya sivîl, dûştê zilmê zaliman raya heq de bibime jû’ rakerdî heta Meydanê Sey Riza ray şî. Nûmayişkaran sloganê zey ‘Dûştê faşîzmî doş bi doş’, ‘Ne derbeya lejkerî, ne dîktatorîya sivîl’ berz kerdî.
Hemserokê Komeleyê Alewî yê Demokratîk Ayten Şîmşîr ser nameyê şêligî qisey kerd û hayr ant hewldayena derbe yê komekê TSK mîyan de. Şîmşîr vist vîrî ke bi teyareyanê herb û helîkopteran êrişê TBMM-MÎT û Serokîna Serfermandarî kerdî.
Yê ke Gezî de kuçeyan qedexe kerdî vengê kuçeyan day
Ayten Şîmşîr da zonayen ke zihnîyeto ke wextê Gezî de vejyayişê kuçe şarî rê kerdî qedexe, nika bi poştdayenê polîs û bi wendişê sela şarî silayînê kuçeyan kenê, seweta saltanata xo nûmayişan virazenê. Şîmşîr vist vîrî ke bin nameyê roşanê demokrasî û vengdayişê kuçeyan de faşîzmî vilayê pêrokîn nifûsa civakî kenê.
Hemserokê Komeleyê Alewî yê Demokratîk Ayten Şîmşîr vist vîrî ke mavêna 17-18ê Temmûze de cayanê cîya yê Tirkîye de dûştê taxanê alewîyan êrişî virazîyayî û nîya dewam kerd: “Nê êrişî hetê ronişteyanê taxî peyser erzîyayî, la polîsî bîyayişan tenya temaşe kerd. Alewî tarîx de ti wext zey ewro nezdîyê qirkerdişê kulturî û fizîkî nêamey. Hewcedarîyê alewîyan yê rêxistinbîyayiş û xopawitiş esto.”
Wextê jûbîyayen o
Şîmşîr ard zon ke gunê alewî tecrubeyanê janî yê raverşîyayişî ra dersî bigîrê û zonayişê kayê ke yenê kaykerden de bê û va: “Wext wextê cîyabîyayiş nîyo; dûştê zilmê zaliman de wextê Raya Heqî de jûbîyayen o”
Şîmşîr da zonayene ke zey Quwetê Ked û Demokrasî ê vanê ‘Ne derbeya lejkerî ne zî dîktadorîya sivîl’ û hina va: “Meseleyê nikayî encex bi demokrasî, azadî û têdûştî yenê çarekerdişî”
Şîmşîr veng da pêrokîn kerdenê ke cepheyê demokrasî tehdît kenê, dîktatorî rewa kenê, hewl danê îradeyê quwetanê mûxalîf-alewîyan bişikînê ra desinde fek bîro veradayen.
Nûmayiş bi sloganê ‘Dûştê faşîzmî doş bi doş’ qedîya.
DÎHA/DERSIM