Serra 15. ya ke dewleta Tirkîya hetê hikumatê AKP-Erdoganî ra yena rayîrberdiş. Hikumatê AKP bi goreyê projeyêkê mîyanneteweyî bi îqtîdar. Dim derbeya 12ê Îlone ra, heme hikumatê ke amey, polîtîkaya xo ro ser qirker- diş û çinêkerdişê kurdan awan kerde. Şerê taybetî yê leymînî ra heta şerê topyekunî, heme awayê zilm, îşkence, vinîkerdiş, veşnayîş û hereketê eskerî yê teberê sînorî, bi kar ardî.
Êy serran ra na heta zê qeydeyêkê xozayî her partîya ke di sîyasetê qirkerdiş û çinêkerdişê kurdan de îsrar kerd, bi xo çinê bî. No qeyde hetê Têgêrayîşê Azadî yê Şarê Kurdî ra, di pratîk de bi doran ame îspatkerdiş û digarg û hîrgargkerdiş. Partîyê ke o wext zî zê nikayî wayîr hukmî bî û heme awayê çinêkerdişî pêk ardê ewro çîn yê. Hetê nifşê ewroyînan ra, nameyê înan zî nîno zanayîş. Bi goreyê ney qanûnê Têgêrayîşê Azadîye, hikumatê AKP zî çinêbîyîşî ver de yo. Na raştîyêka cerebnayî û tarîxî ya. Zê finake, hikumatê Çîllere-Gureş-Agarî ke înan zî xo sultan hesebnayê, heme awayê şerê lîşinî/ qilêrinî bi kar ardîy. Dim veşnayîş û talankerdişê dewan ra çinê bîy. Ma ewro heman rewşe de yê.
Hikumatê AKP-Erdoganî dest bi şerê qilêrinî kerdo. Zanenê ke peynîya înan ameya. Wextê înan temam bîyo. Bi ey hêrsî û bi a kîne, heme bêexlaqîyan bi kar arenê. Ê zî baş bi naye zanenê. Seba zalim û zulmkaran derûnîya en xirabe, bi aqûbetê xo zanayîş o. Hêrsê Erdoganî û çeteyanê ey, naye ra yo. Her ke hêrs benê har banê, her ke har benê reyna hêrs benê. Peynîya na rewşe zî becîyayîş o. Na rewşe zî zê qanûnêkê xozayî ya. Bi goreyê zaniste, germîya rocî bi goreyê qanûnê ‘nukleer vîzyonî’ virazîyena. Rocî de tim û tim teqayişî pêk yenê. Roc her ke teqeno germin beno, her ke germin beno reyna teqeno. Bi no awa germî û estbîyîşê xo domneno heta ke biqedîyo. Vernîyê ma de yanê 16ê Nîsane de, referandûmê aqûbetê dîktatorîya Erdoganî est o. Heke baş bêro bikarardiş, do no referandûm bibo wextê becîyayîşê AKP-Erdoganî. Beşêke yan zî xeylê kurdî belkî vacê ‘ye’ zî ‘nê’ heman çî yê. Seba ma kurdan do çîyêke nêvurîyo. Ma xora îşkence de yê. No feraset bi mantiqêko dûz belkî ma rê raşt bêro. Labelê di esasê xo de yeno manaya dergkerdişê emrê zulm û faşîstîya AKP-Erdoganî.Bi nê sebeban ;Ma vatbî Erdogan bi goreyê projeyêke ardbî îqtîdarî. Awanbîyîşê komare ra na heta heme partîyêke seba çinêkerdişê kurdan bibî îqtîdar, vinî kerd, Kurdistan de bîy partîyê tabelayan. AKP-Erdogan bi erkê xapênayîşê kurdan yê bi rayirêka bînê, bi ol/ dîn ame wezîfedarkerdiş. No erkê xo heta radeyêke bi kar zî ard. Labelê eşa amî û mûme tefêya. Nika Erdogan agêra ra eyarê dewlete yê verînî ser. Ke referandûm de nê vecîyo emrê ey zî qedîyeno. Eke ‘ye‘ vecîyo do emrê faşîzmê Erdoganî derg bibo. Do sultanîya xo îlan bikero û do zilmê xo bidomno. Seba îqtîdarê Erdoganî yew rayîre menda a zî tersnayîş a.
Wazeno îqtîdarê xo bi ters bido domnayîş. Aye semedî ra heme civat kerdo bin zilmî. Heme sazî û dezgeyê dewlete û sivîlî, heme çapemenîye û partîyê sîyasî bêveng kerdê. Meselaya girotişê Hemserek û parlamenteranê HDP zî na ya. Ke muxalefet nêkerê. Kes nêeftareno vengê xo bikero. Heke ‘NÊ‘ vecîyo do zirrnaya Erdoganî reyde tersê şaran zî bişîkîyo. Na zî do heme muxalefetê Tirkîya bihêz bikero. Yê hîrine zî do bêro famkerdiş ke bi rayîra zore û şerî persgiraya kurde çareser nêbena. Na dewlete û heme dinya mecbûr a ke, na mesela rê çareyêka aştîye ser o bivîno.Bi nê hîrê sebeban ke zaf sebebê bînî zî est ê, gere her kurdêke bi na verpersîyarîye şêro sindoqan ser û seba aştî û azadîye, seba sibarojêka roşne vengê ‘NÊ’ bi kar bîyaro.