Rayberê Şarê Kurd Abdullah Ocalan 4ê Nîsana 1949 de dewa Amara ya ke girêdayeyê qezaya Xelfetî ya Riha de ame dinya û emser serra 68. ya Ocalanî yo. Dewijê Ocalanî ke eynî wext de Ocalanî reyde dewe de mendî, qala vîrardişanê xo kenî. Nê dewijan ra yewe zî Mamoste Şevket Uçaro teqawitbîyaye ke o wext şîyêne sinifa 1. o. Babete ser o Uçarî qala vîrardişanê xo kerd.Uçarî va ‘wexto ke ez şîyêne sinifa 1, Ocalan zî şîyêne sinifa 5. û ma pîya Amara ra heta Cîbînî şîyêne’ û wina dewam kerd: “Ocalan sey kekoyêk ma pawitêne. Wexto ke ser ma de zext û tedayêk bibîyêne, sifteyîn ê zext û tedayan êyî dîyêne. Hetta çend reyan çend kesan teda û neheqî bi mi kerdî, her çiqas ke ê kesî merdimê ci bîy daxî, Ocalanî înan reyde pêroda. Ocalanî seba ke mi rê neheqî ame kerdiş, hetê mi de ca girewt. Dima ra kesê ke Ocalanî înan reyde pêroda, şîyî kerra eştî pîyê Ocalanî. Mi û Ocalan ma şîy gerreyê ê kesan mamostayê xo rê kerd. Mamoste va ‘hedîse senî qewimîya’ û wexto ke ma va, da înan ro.”
Ma pîya şîyêne
Uçarî dewamê qiseykerdişê xo de qala yewna vîrardişê xo kerd û wina va: “Min û ey vera mozanê sûran de têkoşîn dayêne. Ma seba kiştişê mozan şîyênê. Çimkî moza sûre zirar dayêne û eke mozî bi merdimî bidayêne, heta mergî zî berdêne. Seba ke zirar dayêne dormeyî, ma şîyêne. Mi tewr peynî serra 1976 de tazîyeya pîyê ci de Ocalanî dî.”
Tena yew rey bes bî
Kesê ke Ocalanî reyde vîrardişê înan estî, nînan ra yewe zî Ferehnaz Ocalane ya. Ferehnaze vana ‘mi wextê domanîya xo de mabênê dewa Erah û Amara de tena reyêk Ocalanî dîyo û no dîyayîş zî seba rêxistinebîyayene bes o’ û wina domnena: “Mi Ocalan û embazanê ey rayîr de dî, labelê mi Ocalanî dûrî ra nas nêkerd. Dewa Erahî ra ameyênê û 5-6 embazî bîy. Wexto ke mi cinîya ke hetê mi de bîye ra pers kerd, ‘nê kam î?’, Aye zî va ‘Evdilayê şima yo, qey to nêşinasna?’ Dima ra Ocalan agêra mi ra ewnîya û dima ra şî. Xora badê mi qet ey nêdî. Ez bi zîhnîyetêko polîtîk pîl bîya û cok ra ez tim raştê îşkenceyan ameya. 3 domanê mi bedarê PKKyî bîy û ez tim ameya tepiştiş. Birayê mi zî sempatîzanê Dev-Solî bî. Rojêk mi girewtî û îşkence bi mi kerdî û mi ra vatî ‘Abdullah Ocalanî to rêxistine kerdo’. Mi zî va tena reyêk mi ey dîyo. Labelê tena reyêk daxî dîyayîş bes bîyo.”
DÎHABER/RIHA