SAFÎYE ALAGAŞ JINNEWS / STENBOL Cinîya bi nameyê Aysel Akgune hunerê destan reyde mijul bena. Akgune demêk tîcaret reyde eleqeder bîya, labelê her ke destê aye veng bîyo, hunerê destan reyde mijul bîya. Akgune dima ra dest bi kulav ser o neqişkerdişê resmî kerdo. Akgune 5 serrî yo ke neqişnayîşê resmî kena. Akgune va ‘zaf kêfê mi nê karî rê yeno’ û wina dewam kerde: “Xeylê westayê ma yê erjîyaye ke kulav virazenî, estî. Ez zî hewl dana xebatanê înan ser o bixebetîya. Ez herinda xalî, kilîm, çente û şewqe de viraştişê tabloyan tercîh kena. Helbet ez yê bînan zî kena, labelê hîna zaf tabloyan virazena.” Akgune dewamê qiseykerdişê xo de wina va: “Ez êdî bi hawayo profesyoneli dawetê festîvalan zî bena û berê mi zaf yenî ecibnayene. No zî mi zaf zerrîweş keno. Heto bîn de ez hetê mîstîkî yê kulavî ra hes kena. Çimkî wexto ke şima kulav ser o xebetîyenî, sebrê şima zêde beno û hêrsê şima qedîyeno. Mi rê sey medîtasyonî yeno. Cok ra ez bieşq nê karî kena. Kesê ke nê karî reyde eleqeder benî, ganî bisebir bibî û xo hertim newe bikerî. Neke beno xo dibarekerdiş.”