Mûş û Farqîn
Kîbar Krîstîn Ozbey di Mûşe de ameya dinya, bi malbatî koçî qezaya Farqîna Amede kerdî û heta 16 serra xo di Ferqîne de cuyaya. Ozbey, heta nika nuştiş, helbest û hîkayeyê a kurdî û tirkî kovar û malper û rojnameyan de ameya weşankerdiş. Demeke di rêzafîlma ‘Ax û Jiyanê’ de zî kaykerda. Her wina Ozbey beşa weşîyê zî wenda û nika di nêweşxaneye de hemşîretîye kena.
Ozbey di nê serrê peynî de bi taybetî zî ser hîkaye û helbestê kurdî ke nusena vindena û her ke şona xo aver bena. Ozbey der heqê nuştoxîya xo de qise kerd.
Ozbey dîyar kerd ke a hetanê nika hîrê pirtûk nuşta û wina vat: “Min yewin ray pirtûka xo ya helbestê ya bi nameyê ‘Saginak Yalnizlik’ bi tirkî nuşt. Peynî zî di pirtûkê xo yê bi sernameyê ‘Şevdanlik’ û ‘Sorxelî’ bi kurdî nuşt. Bi taybetî zî pirtûkê min de hîkayeya min ser cenîyan a.”
Ozbey da zanayiş ke heta nika ser cenîyan zaf pirtûk ameya nuştiş la heme zî hetê mêrdeyan ameya nuştiş û bi nêrîna mêrdeyî cenî di hîkayayan de şekil girewta û wina dewam kerd: “Cenîyê kurd herî weş bi nêrîna cenîyeke û bi qelema cenîyake eşkena bêro nuştiş. Nuştoxê cenî yê kurd wa hîna zaf binusê.”
Bi zonê xo qise bikerê
Ozbey bal ont ser ziwanê maykî û wina domna: “Bi taybetî zî wa di no semedê de ke şarê kurd û cenîyê kurd ona têkoşînek bêhempa danê, cenîyê ciwan û xort û bi ziwanê maykî biwanî û dîroka xo bi ziwanê xo bidê cuyayiş. No ser zî wa ciwan zaftir bi ziwanê xo biwanî û binusî. Yewin ray Celadet Bedîrxan, Fuat Temo, Qedrî Can, Erebê Şemo bi edebîyatê klasîk yê kurdî ziwanê kurdî bi awayekî wêşehî day nişan. Ma zî hewl danî ke şopdarê ê bibî.”
Ozbey destnîşan kerd ke edebîyata kurdî di warê banderkerdişê ziwan de gelek aver şîya û wina vat: “Di nê serrê peynî de gelek nuştoxê kurd, dest ziwanê bîyanê veraday û dest bi nuştişê kurdî kerdî. No zî bo ma nuştoxan keyweşîyek gird a. Ziwan bîyîşê neteweyek û welateka, no ser zî wa kurd qiymetê bidê ziwanê xo.”
DÎHA/AMED