Çarçeweya tehqîqato ke hetê Serdozgerîya Komare ya Amedî ra 2016 de ame destpêkerdiş de 14ê hezîrane de xeylê bajaran de 26 endamê Tevgerê Cinîyê Azadî (TJA), Kongreya Komelo Demokratîk (KCD), Partîya Herêmê Dêmokratîkî (DBP) û Kongreya Demokratîke ya Şaran (HDK) ameybî tepiştiş. 26 kesê ke ameybî tepiştiş, înan ra 16 kesî ameybî tewqîfkerdiş. Babete ser o Parlamentera HDPyî ya Amedî Feleknas Uca û Hemsereka DBPyî ya bajarê Amedî Ruken Akçaye qisey kerdî.
Parlamentera HDPyî ya Amedî Ucaye va ‘bi tepiştiş û tewqîfbîyayîşan hewl danî vernîya sîyasetê kurdan bigîrî’ û wina dewam kerde: “Heta nika AKPyî îdîa kerdêne ke operasyonanê KCKyî yê 2009î o nêviraşto û tim eştêne cematî ser de. Labelê nê operasyonî dewamê operasyonanê KCK yî. AKP nika eynî konseptî meşneno. Tena mabênê ci de ferqêko winasî esto; o wext reyêk de bi des hezaran merdimî ameybî tewqîfkerdiş, nika bi hawayo grûbe tewqîf benî. Heta nika mîyanê serrêk de 10 hezarî ra zêde sîyasetmedarî ameyî tewqîfkerdiş. Operasyonî her ke şonî hîrayêr benî.”
Wazenî îradeya sîyasetê kurdan bişiknî
Ucaye dewamê qiseykerdişê xo de va ‘konseptê tewqîfkerdişî seba ke vernîya sîyasetî bigîrî yenî kerdiş’ û wina domnaye: “Wazenî îradeya sîyasetê kurdan bişiknî û sîyasetmedaran zî bêîrade bikerî. Nêşênî bi tepiştiş û tewqîfkerdişan îradeya şarêk bişiknî. Ê çiqas bitepişî û tewqîf bikerî, ma do hende bi hawayo bihêz xebatanê xo domnenî. Tewqîfkerdişî sîyasî yî. Bi tewqîfbîyayîşan ame famkerdiş ke dewlete û AKP sîyasetê kurdan ra tersena. Xora seba ke tersenî hende tewqîf kenî. Yê ke sey Erdoganî nêfikirîyenî, hedef yenî girewtiş û sucdar îlan benî. Şarê kurd se beno wa bibo, mîyanê çar dêsan de zî têkoşînê xo domneno. Ma tepiştiş û tewqîfbîyayîşan ra nêtersenî. Ma do vera nêyî de têkoşînê xo bidomnî. Ma do heta ke heme embazê ma serbest bêrî veradayîş, têkoşînê xo bidomnî.”
Operasyonê sîyasî parçeyêkê yê kaosî yî
Hemsereka DBPyî ya Bajarê Amedî Rûken Akçaye zî bale ante kaoso ke 2 serrî yo dewam keno ser û wina va: “Na çarçewa de heme tewir hêrişî yenî kerdiş. Operasyonê sîyasî parçeyêkê yê kaosî yî. Bitaybetî nê operasyonî cinîyan hedef gênî; cinîyê ke mîyanê komelî de rayberîya komelî kenî, yenî tewqîfkerdiş. Wazenî bi tepiştiş û tewqîfkerdişan sîyasetê kurdan biqedênî û têk bîşêrî.”
DÎHABER/AMED