Çarçiweya konsepta şerî ke bi bira AKPe dijî kurdan de ameya destpêkerdiş, Kurdistan de zafaneya înan doman û cenî yî zaf humarî de welatijê sivîlî bi destê polîsan ameyî qetilkerdiş. Taybetî zî demo ke Nisêbîn, Cizîr, Farqîn û Sûrî de qedexeya vejyayîşê teberî estbi de nêy qirkerdişî amey viraştiş. Babete sero dayîkê ke domanê înan ameyî qirkerdiş qalî kerdî.
Dewlet qestî ra kişt
Dayîka Mazlum Turanî ke Qosera Mêrdînî de amebî qirkerdiş Yuksel Turan ciresna ke nêy hîrê aşma ke Mazlum şehîd kewto û wina verdewam kerd: “Mazlum wexto ke embazanê xo reyde karî ra ameynê keye, ame qetilkerdiş. Domanê min bazirganîya kergan kerdênî. Dewlete qestî ra domanê min qetil kerd. Tena guneyê domanê min semedo ke kurd bî ame kiştiş. Dewlet vana ke ‘Semedê ke ehlîyetê ci çinêbî remayo û ma vato bivinder la nêvindeto û ma zî dayo piro.’ Ez zî vana şima çi zanaynê ke ehlîyetê ci çino, ma erebeyê serî nuseno ke ehlîyetê ci çino. Zuran kenî, wa destê xo ser domananê ma ra kaş bikerî.”
Ma destûr nêdanê
Dayîka Tahsîn Urayî 9 serre ke o zî Qosera Mêrdînî de ame qetilkerdiş Nercîhan Uray zî ard ziwan ke êy do qatilê domanê xo ra hesab bipersî û wina domna: “Domanê min berî ver de çîyo ke nêzana çîyo girewt destê xo û no çî teqay sero cuyê xo day. Aye wext mudaxaleya ewil ma kerd la ambulans nêame. Çi zirarê domanê min ê 9 serre yewî ra estbi? Wa êdî hesirê çimanê dayîkan bivindero û hende zilm zî bes o. Ma do hesabê domananê xo bipersî.”
Nê hardî yê ma yê
Dayîka Adem Sevînçî ke wexto ke keyeyê datê xo ra agêraynê ame kiştiş Zeynep Sevînç zî dîyar kerd ke werte de ti hedîse çinêbî û wina vat: “Panzerî dekewtî papole mîyan û domanê min bi awayo bêgune ame kiştiş. Ma nêy qirkerdişan qebul nêkenî. Wexto ke domanê min birîndar beno, xo erdî ra kaşkerdişî reyde weyra ra dur keweno. Kamder wijdan no qebul keno. Ey do şarê kurdî wina biqedênî? Ma do gonîya domananê xo ra îxanet nêkerî. Nêy erdî yê ma yî.”
Kurdî teslîm nêbenê
Tewr peynî dayîka Dîyar Akinî, Mehsuba Akin zî wina vat: “Min domanê xo semedo ke derman bigîro eşrawitbi, yew saetî ra dima ma zanayîşê ke domanê min nêweşxaneye de yo, girewt. Heta ke ma resay nêweşxaneye, domanê min şehîd kewt. Qesebaya ma veşay, wa qesebaya sewbîna dayîkan nêveşo. Sucê domanan se beno wa bibo, lazim o domanî ti car nêrî qirkerdiş. Kurdî aye roje zî teslîm nêbî û do eyro zî teslîm nêbenî.”
BÊRÎTAN CANOZER/BÊRÎTAN ELYAKUT /JINHA/AMED