Meclîsê Cinîyan yê Partîya Demokratîke ya Şaran (HDP) bi rojeva 25ê teşrîna peyêne Vera Şîddeto ke Cinîyan rê Beno de Roja Têkoşînî û weçînayîşê herêmî kom bi. Salone de pankarto ke ser o ‘Leyla Guvene heqdar a, ganî tecrîd wedarîyo’ ame aliqnayene, fotografê Leyla Guvene ke 6 rojî grevê vêşanîye de ya, ameyî kiriştene.
Hemsereka HDPyî Pervîn Buldane kombîyayîş de qisey kerde û malumatê muhîmî pare kerdî. Buldane parlamenter Leyla Guvene heme sîyasetmedarê cinîyî ke tewqîfkerde yî, silam kerdî. Buldane va ‘ê wayîrê çalakîya Leyla Guvene vejîyenî’ û wina domnaye: “Kes nêşena îradeya cinîyan teslîm bigîro û do nêşênbî zî. Ê ke vanî qey do bi no qeyde cinîyan teslîm bigîrî, wa bizanî ke nêşênî. Çîyo esasî mekan nîyo, rayîr û hedefê ma yî. Ma do zîndanan de, ziqaqan de û Meclîs de zî rayîr ra şêrî.”
Buldane dewamê qiseykerdişê xo de wina va: “Ma prosesêko ke ti xebere Birêz Ocalanî ra nîna girewtene ra derbaz benî. Parlamentera ma Leyla Guvene seba ke bale bianco tecrîdî ser, dest bi grevî kerde. Ma çalakîya Guvene silam kenî. Ma do nika ra pey vera tecrîdî de vengê xo berz bikerî. Çimkî tecrîd eynî wext de azadîya cinîyan ser o zî yeno domnayene. Ma do cinîyan reyde tecrîdî wedarnî.”
Cinîyan ra tersenî
Buldane qiseykerdişê xo de qala hêrişê hukmatê AKPyî kerde û wina va: “Hukmatê AKPyî hêrişê qezencanê cinîyan keno. Çimkî cinîyan ra tersenî. Sîyaset û qerardarîya cinîyan ra tersenî. Rejîmê yew merdimî bi hawayo baş zano ke tena cinîyî eşkenî înan bivindarnî. Cok ra dezgehê cinîyan ameyî padayene û sîstemê hemserekîye çin hesibîya. Ganî cinîyî vera nê rejîmê yew kesî de bêrî têhet. Ma heta nika hertim bi îttîfaqê cinîyan qezenç kerd. Vernîya ma de weçînayîşê herêmî yê 31ê adare esto. Wa ti kes tena sey weçînayîşî nêvîno. No weçînayîş rayîrraşîyayîşê cinîyan do nîşan bido. Îttîfaqê cinîyan do serbikewo.”
Qayûmî do şêrî û cinîyî do bêrî
Buldane qiseykerdişê xo de bale ante kerdişanê qayûman ser û wina va: “Cinîyî do xo zî û bajaranê xo zî îdare bikerî. Cinîyî do peynîya qayûm û kerdişanê înan bîyarî. Ma zanî ke roja ke qayûmî ameyî ra nata hertim cinîyan hedef gênî û dezgehanê cinîyan padenî. Hêrişê erjê kurdan kerdî û hewl dayî çin bikerî. Ma soz danî ke ma cinîyî do peynîya ê qayûman bîyarî û cinîyî do herinda xo de bironîşî.”
Wa heme cinîyî bibî namzed
Buldane peynîya qiseykerdişê xo de veng da heme cinîyan û wina qedênaye: “Ma vera îttîfaqê camerdan de îttîfaqê cinîyan ronenî. Ma do destê yewbînan bigîrî û bihêz bibî. Wa heme cinîyî bin banê HDPyî de bibî namzed. Ma veng danî heme cinîyan ke wa bêrî HDP de sîyaset bikerî û hêzê xo yewna rey nîşan bidî. Badê ke tarîxê muracatî ameyî dîyarkerdene, wa heme cinîyî seba muxtarîye, hemserekîya şaredarîyan û endamîya meclîsî muracat bikerî. Ma heme cinîyan seba nêyî dawet kenî. Ma do pêro pîya qezenç bikerî û pêro pîya serbikewî. Ma do embazanê xo cinîyan biresnî azadîya înan û pêro pîya tecrîd wedarnî.”
JINNEWS / ANQARA