KCK veng da pêrokîn şaranê Kurdistanî û dostanê ci ke bi slogana ‘Bê Serok ciwîyayiş nêbeno’ werzerê ser payan û nûmayişanê ‘Nêşkenê rojê ma tarî bikerê’ ra girder nûmayişan virazê.
KCK vist vîrî ke verra Rayverê Şarê Kurd Abdullah Ocalan 5ê Nîsan 2015î ra na het tecrîdekê giran yeno ramiten û aşkere kerd ke gama sifteyîn yê herbê dûştê kurdan redkerdişê Mutabeqatê Dolmabahçe bi û peycoy tecrîdê giran destpa kerd. Hemserokîna Konseya Rayverîn da zonayen ke a roj ra na het Öcalan nêşkeno bi malbat û pawitoxanê xo ra pêdiyayin virazo û va na kerden dûştê pêrokîn şarê kurd yeno maneya herbî. Damûstayîn de vajîya ke badê hewldayenê derbe ya 15ê Temmûze gumanê şarî û hereketê ma yê serva weşî û tîvarîya Rayver Apoyî vejyay merhaleyêda tewr corîn.
Ganî ma bi lezîn zonayişî bigîrê
Hemserokîna Konseya Rayverîn yê KCK hayr ant vatişanê Ocalanî yê derheqê cemeatê Fetûllahîyan ser û persa, ‘kam şeno vajo ke ekîbo ke bi seyan kesan bi helîkopter, teyare û bi tanqan qetilkerd, do Îmrali zî hedef nêkerê’ kerd û wina va: “Fetûllahîyan bi serrano serva ke dewlet bigîrê dest dişmenîya Apo û PKK kerd. Rîwalê nê pêrokîn sebeban ganî ma bi lezîn derheqê weşî û tîvarîya Rayver Apo de zonayişî bigîrê. Pêrokîn serpirodayişê pêdiyayinî yê malbat û pawitoxan ame redkerden. No waşten heqê tewr însanî û esasî yo. Bi redkerdişê waştena pêdiyayinî binlinkerdişê heqê esasî yê însanî yo.”
Wezîfeyê sifteyîn wayîrvejyayişê rayverê xo yo
Damûstayîna Hemserokîna Konseya Rayverîn de vajîya ke wexto ke weşî û tîvarîya Rayver Apo ra xeber nîna girotiş de maneyê vatişê ‘Wa Îmrali de muzakere destpa bikerê’ zî nêmendo û wina dewam kerd: “Nika rojdema hereketê ma de tenya weşî û tîvarîya Rayver Apo esta. Wezîfeyê sifteyîn yê jew şarî û hereketî wayîrvejyayişê rayverê xo yo. Jew şaro ke wayîrê Rayverê xo nêvejyeno nêşkeno wayîrê azadî, demokrasî, welat û şarê xo zî bivejyo. Weşî û tîvarîya Rayver Apo meseleya tewr esasî ya sîyasî ya. Xo ra bi serrano şarê ma vano ‘Nezdîbîyayişê Rayverê ma sebebê haştî û herbî yo’. “
Damûstayîn de vistîya vîrî ke 15ê Temmuz ra na het Awrûpa ra heta Awûstûralya û çar leteyanê Kurdistanî şar ser payan o û nûmayişan virazeno. KCK va rixmê nê nûmayişan nêviraştişê pêdiyayinan şar û hereketê ma vist alarmî û aşkere kerd ke badê na merhale heta ke Rayverîye ra xeber bîro giroten şar do her şiklî nûmayişan virazo û wayîrê Rayverîye xo bivejyo.
Roj roja wayîrvejyayişê Rayverîye ya
Hemserokîna Konseya Rayverîn yê KCK aşkere kerd ke roj roja roniştişî ya zî qiseykerdişî nîya; roj roja wayîrvejyayişê Rayverîye ya û wina va: “Wayîrvejyayişê no Rayverîyo ke pêrokîn ciwîyayişê xo de wayîrê şarî vejya deynê pêrokîn kurdan o. Bê wayîrvejyayişê Rayverîye bi azad û demokratîk ciwîyayişî ca verdê, zey kurdekê ciwîyayişî heqkerdiş zî mimkûn nîyo. Hereketê ma na roj ra tepya Bakûrê Kurdistan de ‘wayîrvejyayişê Rayverîye zey rojdema sifteyîn îlan kerd. Bê ke Rayverîye ra wayîr bîro vejyayiş şarê kurd nêşkeno wayîrê tebayî bivejyo. Nayî ra ganî pêrokîn nûmayişî çarçoveyê weşî û tîvarîya Rayverîye de bîrê viraştiş. Endî ganî şarê ma bikewo alarmî, nûmayişê girdêrî virazo. Ganî ma winî nûmayişan virazê ke hikûmeta AKP ganî desinde pêdiyayişanê Rayverîye ma bi malbat û pawitoxanê ci ra destûr bido.
‘Bê Serok Ciwîyayiş nêbeno’
Hemserokîna Konseya Rayverîn yê KCK aşkere kerd ke ganî şarê Kurdistanî çar leteyanê welatî û teberê welatî de her ca de werzero ser payan û bi serwedarnayişan wayîrê Rayverîye xo bivejyo. Damûstayîn de hayr ancîya nûmayişanê ‘Nêşkenê rojê ma tarî bikerê’ yê 1999î ser û vajîya ke ganî nê nûmayişan ra berzêr û girderî nûmayişî bîrê viraştiş. KCK veng da şaranê Tirkîyeyî, quwetanê demokratîk û pêrokîn şar û quwetanê sîyasî yê hetkarê azadî yê Rojhelatê Mîyanî ke tewrê nûmayişanê wayîrvejyayişê Ocalanî bibê.
Damûstayîn de vistîya vîrî ke wayîrvejyayişê Ocalanî, wayîrvejyayişê ciwîyayişê azad û demokratîk yê pêrokîn şaranê Rojhelatê Mîyanî yo. KCK va ganî pêrokîn cenîyê Kurdistanî, gencî, kal û pîrî, domanî; misilman, êzidî, elewî, xirîstîyan û pêrokîn îtiqat û qomî wayîrê Öcalanî û ciwîyayişa demokratîk bivejyê. No çarçove de KCK veng da pêrokîn şaranê Kurdistanî û dostanê ci ke bi slogana ‘Bê Serok ciwîyayiş nêbeno’ werzerê ser payan.
ANF/BEHDÎNAN