Ravêreyeya ke tede behsa aştîye ameynê kerdiş de AKP konseptê şerî vist dewre û dima zî yew hetî ra hemverê sîvîlan emrê hêrişan da û heto bîn ra zî bira bombekerdişê mezelê ke aydê PKKijan, camî û cemxaneyan day. Babete sero Hemsereka Komeleya Kultirî ya Pîr Sultan Abdalî ya Amedî Nurşen Akbal ciresna ke ya sey elewî hêrişê ke hemverê mezelan yenî kerdiş şermizar kena û wina domna: “Dewleta tirk bi serran a ke hemverê şarê kurd sey dişmenî nêzdî bena. Nika polîtîkayê dewletî serranê 90’î ra zî xirabêr î. Ger ke şehîdê yew şarî ra hêriş bêro kerdiş se, aye yeno manaya ke şeref û rumetê no şarî ra hêriş yeno kerdiş.”

Ma qebul nêkenî
Akbal dergeyîya qalîkerdişê xo de bal ant ser polîtîkayê çinîkerdişî û wina vat: “Bêhuqiqîya tewr gird no yo ke merdim nêverdo yew şar lazimîyê xo yê tewr bingeyîn zî bîyero ca. Ti dîn û bawerîye de îzehetê nêyî çino. Madem ti muxatab nêgênî aye wext xo bidi yew hetî. Çinîkerdişê tutî ra bigî heta kalê yeno çi manaye? Ma hêrişê ke hemverê dîn, kultir, ziwan, dîrok, xoza û sewbîna çî qet qebul nêkenî û ma do hemverê kesê ke no şerî dayo destpêkerdiş zî bivindî. Ma nêyî şermizar kenî.”

Êy şer wazenî
Endama KJAye Aynur Ayşan zî derheqê babetî de ard ziwan ke hetgirê şerî Kurdistanî de nê 40 serra ke hem hetê komelî de û hem zi hetê sîyasî de şer danî meşnayîş û wina domna: “Wazenî Kurdistan çinî bikerî. Gever, Cizîr, Nisêbîn, Gimgim û Farqînî de çîyê ke amey kerdiş zî finakê nêy polîtîkayanê înan î. Hemverê mezelanê şehîdan ke semedê no şarî çîyo tewr erjîyaye yo ra hêriş kerdî. Gule camîyan sero varnay û xira kerdî. Wazenî ke heyfê 40 serran mezalan ra bigîrî. Bi no hawa wazenî bi paydernayîşê damarê kurdan, şer bidî destpêkerdiş.”

Ma do xover bidî
Ayşan qalîkerdişê xo de bal ant ser hêrişê ‘Şehîdgehê Xerzanî’ û qalîkerdişê xo wina peynî kerd: “Tîya de şarî sero gule amey varnayîş û waştî ke qetlîamek gird bivirazî. Encamê no hêrişî de zaf kesî dirbêtin bî. Pirtukxaneya ke semedê keyeyê şehîdan amebi viraştiş zî ame bombekerdiş û xira bî. AKP wazena kurdan bideka binê bandorê xo. Erdogan zî semedê ke wazeno bibo yew merdim, no şarî ceza keno. Labelê no şar ci ra milê xo çewt nêkeno.”

BÊRÎTAN CANOZER

JINHA/ AMED