Nê rojnamegeran ra Mudira Karê Nuşteyan ya Ajansê Xeberan yê Etkînî (ETHA) Derya Okatane qisey kerde.
Okatana ke serbest ameye veradayîş, wina va: “Ez 10 serrî yo ke rojnamegerî kena û veradîyayîşê xo ver kêfweş nêbîya; çimkî embazê mi yê bînî ameyî tewqîfkerdiş.”
Min çîyêko winasî qet nêdî
Okatane dewamê qiseykerdişê xo de va ‘ez rojnamegerî kena û heta nika mi bi desan dosyaya dozan taqîp kerdo, la çîyêko winasî mi qet nêdîyo’ û qiseykerdişê xo wina domnaye: “Ma çarçeweya tehqîqatê RedHackî de ameyî tepiştiş. 24 rojî ma nêzana ke ma seba çi ameyî tepiştiş. Dima ra zî bi endamîya rêxistine bîyayene, ma rê ame îsnatkerdiş.”
Okatane bale ante sebebê tepiştişî û wina va: “Ma çarçeweya RedHackî de ameyî tepiştiş la eleqeya xo bi neyî çinêbî. Dima ra ame famkerdiş ke ti eleqeya ma bi RedHack û maîlê Berat Albayrakî reyde çin o. Labelê operasyonêko wina gird bê tewqîfkerdiş nêbîyêne, seba ci 3 embazê ma sey ‘qurban’ ameyî weçînayîş. Hişê merdim nêgeno. Wa her kes bizano ke çi destê ma ra bêro seba embazê ma yê ke tewqîf bîyî, ma do bikerî.”
Ma do sere nêronî
Okatane peynîya qiseykerdişê xo de wina va: “Cinîyî hîna zafêr raştê teda û zextan yenî. Ez mîyanê 24 rojan de raştê hêrişanê cîya-cîyayan ameya. Polîsê camêrdî lengan çînayêne, ez raştê heqaretî ameya û bi mergî tehdît bîya. Ez eşkena vaja vera cinîyan de hêrişê cîyayî estî. La se bikerî zî nêeşkenî ma cinîyan rê sere bidî ronayîş.”