Hemserekîya Konseyê Caardene yê KCKyî netîceyê weçînayîşî ser o daya zanayîş ke îqtîdarê AKP û MHPyî seba ke îqtîdar de bimanî, bi her hawayî zext, teda û neheqîyî kerdî û wina domnaya: “AKP û MHP Tirkîya de destekê xo vînî kerdî. Cok ra ganî kurd û hêzê demokrasî nê netîceyan meşrû nêvînî û vera îqtîdarî de têkoşînê xo bidomnî.”
Hemserekîya Konseyê Caardene yê KCKyî derheqê netîceyê weçînayîşê 24ê Hezîrane de îzehetêko nuştekî daye. Hemserekîye dîyar kerde ke weçînîyayîşê Erdogan û blokê faşîstî meşrû nîyî û nînî qebul kerdene.
Hemserekîye îzehetê xo de dîyar kerda ke weçînayîş şert û mercê zext û nêseyyewbînanîye de virazîya û wina dewam kerdo: “No weçînayîş seba ke polîtîkayanê xo yê dişmenê kurd û demokrasî meşrû bikerî, ame viraştene û bi her hawayî zext, hîle û neheqîyî ameyî viraştene. Îqtîdarê AKP û MHPyî seba ke îqtîdar de bimano, çi destê ci ra ame, kerd. Cok ra çi weçînîyayîşê serekkomarî û çi zî zaf ray girewtişê nê îttîfaqî, meşrû nîyî. Ganî hêzê demokrasî nê nêtîceyan meşrû nêvînî û têkoşînê xo bidomnî.”
Hemserekîye dewamê îzehetê xo de wina vato: “Armancê tewr gird yê faşîzmê AKP û MHPyî o bi ke HDP binê bendê weçînayîşî de biverdî. Labelê seba ke şarê kurd û yê Tirkîya wayîrê HDPyî vejîyayî, HDPyî bendê weçînayîşî derbaz kerd. Ma kurd û hêzê demokrasî ke dormeyê HDPyî de bîyî kom, pîroz kenî.”
Ganî ma meşrû nêvînî
Hemserekîye bale anto zext û tedayanê îttîfaqê AKP û MHPyî ser û wina vato: “Îttîfaqê faşîstî yê AKP û MHPyî bi her hawayî zext, hîle û neheqîyan serekkomarîye xesp kerdî û zafaneyê meclîsî girewtî destê xo. Cok ra ganî no sey serkewtiş û bihêzbîyayîş nêro dîyayene. Raştîya xo de şarî nîşan dayo ke nê îttîfaqê faşîstî nêwazeno. Eke vera nê îttîfaqî de têkoşîn bêro dayene, o wext do bêro dîyayene ke no îttîfaq nêmaneno. Xora AKP û MHP partîyê ke bibî hêzê îdarekarî, nîyî. Îttîfaqê AKP û MHPyî Tirkîya de destekê komelî vînî kerdî. Wexto dîyî ke weçînayîşî vînî kenî, bi zura ‘ma vera Qendîlî de operasyon virazenî’ şarî xapênayî. Seke no zî bes nêbo, zura ‘ma da 35 îdarekaranê PKK û KCKyî ro’ zî eştî. Cok ra ganî ma îqtîdarîya nê partîyan qebul nêkerî.”
Donemêko newe yê zextan dest pêkeno
Hemserekîye qala îttîfaqê şerî yê AKP û MHPyî kerda û wina domnaya: “Îttîfaqê faşîstî yê AKP û MHPyî îttîfaqê şerî yî. Cok ra nê her di partîyî do nê polîtîkayanê xo bidomnî. Wina aseno ke do domnemêko newe yê zext û tedayan dest pêbikero. Wa kurd û hêzê demokrasî bizanî ke ancax bi têkoşîn demokrasî yena. Problemê Tirkîya bêxera demokrasî, sewbîna hewa çareser nêbenî. Xora îttîfaqê faşîstî yê AKP û MHPyî weçînayîş ra dima dîyar kerdî ke ê do heme cayan de vera kurdan de hêrişanê xo bidomnî. Wa ciwanê kurdî zî vera nêyî de heme waran de beşdarê warê têkoşînî bibî û cewab bidî faşîzmî. Ma sey Tevgerê Azadîya Kurdî do heme ca de vera nînan de têkoşîn bidî. Heta ke no îtqîdaro faşîst binkeweno, ma do têkoşînê xo bidomnî. Emrê nê îqtîdarî faşîstî do derg nêbo. Şarê ma do bi têkoşînê xo yê demorkatîke peynîya nê îqtîdarî bîyaro.” n ANF/BEHDÎNAN