Endamê Meclîsê Şaredarîya Rezanî Bakir vat ke vateyê Newroze êdî her kes zaneno, verê mîladî bi vengê xoverdayişê Kawayo Asînkar dest pê kerd, na roje ra nika seba Kurdan bîyo kultir, do bi coşê Newroze polîtîkayê qeyumî ra cewab bêro dayiş.
LÊL AMED / AMED
Bi talîmatê Serekkomar Recep Tayyîp Erdoganî rayedarê AKPî bi nameyê ‘Rêziknameyê Qanûnê Rayberîya Xocayî’ qanûnêk hadre kerdî, goreyê no qanûnê zaf selahîyatê serekê şaredarîyan do dewrê Serekkomar Erdogan, Wezaretê Bajarvanî û Walîyeyî ra bêrê vîyartiş. Peynîya vînîkerdişê Şaredarîyê Bajarî yê Girde Erdogan rojnemî ra ‘Şîyîş û ameyişê şaredarîyan’ ardbî. Armancê Erdoganî kontrolê şaredarîyê muxalîfî yo û xo ra Kurdistan de zî şaredarîyê Şarê Kurd ra zî qeyuman tayîn kerdbî.
Wazenê heme rantî Qesre de kom bikê
Qanûnê ra Endamê Meclîsê Şaredarîya Rezanî Nurettîn Bakano ke cayê ey ra qeyum ame tayîn kerdiş bertek nîşan da û vat ke Meclîsê Şaredarîya Rezanî ra 12 endamê Meclîsê HDPî ameyî wezîfe ra girewtiş û wina vat: “Îqtîdarê AKP û MHPî bi tayînkerdişê qeyuman waştî heme selahîyetê şaredarîyan do Erdogan de kom bibê. Wazenê heme rantê welatî Qesrê Erdoganî ra bivîyaro û nê rantî zî seba xizmetê şarî nêşuxilnenê. Eke armancê înan xizmet bibîynê ma wezîfe ra nêgirewtinî, çimkî ma şarê xo şinasnaynê, ma zaneynî senî şarî ra xizmet bikê.”
Bakan destnîşan kerd ke ê heme qanûnê şaredarî ra haydar ê, ê wazenî heme pereyê şarî, şer ra bidê şuxilnayiş û wina domna: “Qet armancê Îqtîdarê AKP û MHPî nê şarê Kurd nê zî şarê Tirkîyaye ra xizmet o, no nêzdîbîyayişê înan ameyoxê ma tarî keno. Ma tesilî qebul nêkenê, ma sereyê xo zî nêtewînenê, ma do hetanî peynî tewro dilopa gonîya xo têkoşîn bidê û şopdarê ci bibê. Ma bawerî êdî şarê ma her çik ra haydar o do serkewtiş ê ma bibo.”
Newroz rayîrê azadî ya
Bakan bal ant avzelîya Newroze û wina dewam kerd: “Vateyê Newroze êdî her kes zaneno, verê mîladî bi vengê xoverdayişê Kawayo Asînkar dest pê kerd, na roje ra nika seba Kurdan bîyo kultir. Newroze yena vateyê roja newe û Rojhelatê Mîyanênî de zaf hûmarî dewlete de zî yena pîrozkerdiş. Taybetî şarê mazlum û heqê înan destê înan ameyo girewtiş taybetî wayîrê Newroze vejîyenê, çimkî Newroze ra rayîrê azadîye vîyareno, ma sey Kurdî, Kurdistanê Vakûrî azadîya xo Newroze de vînenê. Seba demokrasî û bîrayîya ma yê Tirkan ser o azadî şert o. Ma vera nijadperestan wayîrê Newroze vejîyenê, Newroze emserrin do bi coşêko gird bêro vîyartiş, şarê Amedî zî do Newroza xo ra wayîr bivejo.”