Seba wekerdişê adirê Newrozî Rojhelatê Kurdistanî ra heta Rojawa, Başûr ra heta Vakûrê Kurdistan nika ra amadekarî yenê ramiten. Vakûr de adirê Newroz do emserr 33 cayan de bîro wekerdiş. Endamê Komîteya Amadekar ê Newroze Omer Onen’î ard ziwan ke Newroz seba Kurdan roja raperîn û xoverdayîşî ya. Onen’î veng da her kesî ke adirê Newroze her ca de geş bikerê. 

Emserr roşanê Newroze do pêşengîya Kongreya Civaka Demokratîk (KCD), Kongreya Demokratîk ê Şaran (HDK), Tevgera Cinîyê Azad (TJA), Partiya Demokratîk ê Şaran (HDP) û Partiya Herêmên Demokratîk (DBP) de bi slogana “Ma do qetîye serbikewê” 33 navendan (cayan) de bîro bimbarek kerden.  Startê Newroza 2017î Amed de ame dayen. Temsîlkaranê KCD, HDK, TJA, HDP û DBP bi kombîyayîşeke çapemenî teqwîmê bimbarekîyane Newroze aşkere kerdî. 

‘Do Nisêbîn de destpa bikero’

Adirê ewil yê Newroza emserrî do 17'ê Adare de Nisêbîna ke 134 rojan qedexeyê vejyayîşê teber ame îlankerdiş de bîro wekerdiş. Bi nayî ra startê bimbarekînanê Newroz zî Nisêbîn ra do bîro dayen. Dima ra, 18'ê Adare de Edene, Sêrt, Dersim, Meletî, Bazîd, Manisa, Kocaelî, Îzmîr de bimbarekînî dê dewam bikerê.  

19'ê Adare de Stenbol, Mersin, Antalya, Riha, Êlih, Konya, Xerpêt, Dep, Qers, Hatay, Qoser, Dîlok û Eneqere de merasîmê bimbarekîye dê virazîye. 20'ê Adare de Semsûr, Îdir, Bedlîs, Colemêrg û Agirî de, û tewr peynî de zî 21'ê Adare de zî do fînalê Newroze bi coşeke gird Amed û Wan de bîro bimbarek kerdîş. Tenya Amed de nê, eynî roj Cizîr, Gever, Bursa, Muş û Çewlîg de zî merasîmê Newroz dê virazîye.  

Newroza 2012 ra na het

Derheqê amadekarî û muhîmîya Newroza emserr û xebatê referandûmî de Endamê Komîteya Amadekar û Endamê MYK yê HDP Omer Onen’î qisey kerd. Onen’î ard ziwan ke Newroza emserr seba şaranê Kurd û Tirk xêlê muhîm a. Omer Onen’î vist vîrî ke her serr Newroz bi tewrbîyayîşê mîlyonan kesan yena bimbarek kerdiş û wina dewam kerd: “Serra 2012 de, rixmo ke Newroz qedexe bî, reyna Newroz bi coş û tewrbîyayîşeke gird bimbarek bî. Rixmê qedexe fina adirê Newroze ame wekerdiş. Serra 2016’î de zî rixmê qedexeyê vejyayîşê teberî ame îlankerdiş û merasîmê Newroze amey qedexe kerdiş zî fina zî Newroz amê bimbarek kerdîş. Rixmê nayî şarî adirê Newroz wekerd.” 

Do bibo Newroza serbestîya şaran

Omer Onen’î da zonayene ke şarê Kurd Newroz seba xo zey roja vejîn û raperîn qebûl keno û wina va: “Şarê Kurd zey ke Kawayê Asinkar vera  zilmê Dehaqî, Mazlum Dogan o hemdemî vera zilmê dewlete xover da û tarî parçe kerd, şarê Kurd zî fina dûştê zilmî xover dano û do adirê Newroza emserr her ca de geş bikero. Tarîx de şarê Kurd her tim vera zilmî û seba heqanê xo têkoşîn dayo. Her wext vera tarîyî ronahî serkewta. Newroza 2017î do bibo Newroza serbestîya şaran. Eynî wextî de do bibo Newroza yewîya şarê kurd. Ma vera zilmî vanê ‘Hinî bes o. ’  Ma veng danê her kesî ke wa bîrê adirê Newrozî geş bikerî.”

Botan vera zilmê Dehaqan de xover da

Onen’î vist vîrî ke her serr cayo ke tewr vêşêr adirê Newroz geş beno Herêma Botan a û bi nê vatenan hayr ant sebebê startê bimbarekînanê emserr Nisêbîn ser: “Cayo ke tewr vêşî bedel û dejî anto herêma Botan a. Şarê Botanî cêrzemînan de raştê wehşetî amey. Şarê Cizîr vera zilmê Dehaqan de xover danê. Xoverdayîşê Kawa ya tewr gird do zey xoverdayîşê Cizîr, Gever, Nisêbîn û Sûrî ravêr şiro. Seba ke ma rexnedayîşê xo yê hemverê şarî bidê ma startê Newroz Nisêbîn de danê û ma sûkanê Cizîr û Gever de zî adirê Newroz geş kenê. Wekerdişê adirê Newroze seba ma rexnedayîşê şarî yo.”

‘Ma bi îradeyê xo wayîrê adirê Newroze bivejyê

Endamê Komîteya Amadekar Omer Onen’î tewr peynî de vist vîrî ke hinî çîyo ke şarê Kurd vinî bikero çin o û bi nê vatenan veng da şarî: “Ganî her kes bivejyo meydanê Newroz û adirê Newroze geş bikero. Wekerdişê adirê Newroz do ma hona vêşî nezdîye azadî bikero.Nayî ra ma adirê Newroz, keyeyê xo de, kuçeyê xo de, her ca de geş bikerê û her cayî açarnê Newroz. Ma ti wext milê xo çewt nîkenî û ma dê heta çilka peynî yê gonîya xo têkoşîn bikerî. Yê ke wayîrê adirê Newrozî bivejyê, eynî wext dê wayîrê îrade û azadîya xo zî bivejyê.   


DÎHABER / AMED