Mesajê Rayberê Şarê Kurdî Abdullah Ocalanî ke Newrozê 2013, 2014 û 2015 de ameybî wendiş û seba şaran hêvîyêka girde awan kerdbîy, 2 serrî yo seba ke rayîrê Îmrali padîyayî, nîno wendiş. Babete ser o Parlamenterê HDPyî yê Anqara û Verfekê Heyetê Îmrali Sirri Sureyya Onderî qisey kerd.

Onderî va ‘Newroze seba kurdan ameyêne manaya xoverdayîş û azadîye, labelê serranê peyênan de yeno manaya roşanê aştî zî’ û wina dewam kerde: “Nê 4 serranê peyênan de êdî manayêka winasî ya Newroze zî esta. Êdî Newroze yena manaya rojêka bicoş û biqerar. Manîfestoya ke Birêz Ocalanî Newroza 2013 de erşawitbî, manayêka winasî Newroze ser de bar kerde. Labelê hukmatî prosesî bişer qedêna û wina kerd ke ma reyna agêrayî prosesê şerî. Yanî ma reyna agêrayî îmha û çinikerdişan. Labelê no konjoktur nêeşkeno na manaya newe ya Newroze înkar bikero. Tam çepê ci de ganî ma hîna zaf na manaya Newroze ser de bivinderî.”

Firsendêko tarîxî yo 

Onderî va ‘hukmatî Newroza 2012î bêxera roja 21 Adare, pîrozkerdişê heme rojan qedexe kerdbî, labelê no qedexe dima ra amebî derbazkerdiş’ û wina domna: “Wazenî emser zî çîyêko winasî bikerî. Labelê tarîx nîşanê ma da ke êdî şar qedexekerdişê Newroze qebul nêkeno. Wextê qedexekerdişî rewna vîyarto. Çimkî ma qala şaro ke seba ziwanê xo yê qedexekerde qisey bikero, xeylê bedelî dayî kenî. Ma do sey partîye cayê ke tede dejî zêde ameyî cuyayîş de sifteyîn Newroze pîroz bikerî. Cizîr, Sûr, Nisêbîn û sewbîna… Çimkî nê cayan de zulm û hovîtîya tewr girdî ameyî cuyayîş. 

Onderî dîyar kerd ke ‘referandûm emserr raştê Newroze yeno û no seba şarê kurd firsendêko tarîxî yo’ û wina va: “Çimkî Newroze seba xebatanê ma yê referandûmî lingêka gird a. Eke Birêz Ocalanî ser de tecrîd nêbîyêne û ma ey bidîyêne, tesilî do verê ma rexne bikerdêne û do bivatêne ‘heta nika şima se kerd, şima çi kêmî verda û şima kura de şaşî kerd?’ 

Saya Ocalanî de yo 

Onderî qiseykerdişê xo de va ‘hîna zaf kesan nameyê DAIŞî nêzanayêne, o wext Birêz Ocalanî ê hêzî tarîf kerdbî’ û wina domna: “Birêz Ocalanî sey çareserî Hêzê Aştî yê Kurd pêşnîyaz kerdbî. Rayîrê nêyî zî Kongreya Mîyanneteweyî de dîyêne. Hende na babete ser de vindetêne ke xeylê kede dayêne û ser o fikirîyayêne. Eke sey vatişê Birêz Ocalanî bibîyêne, ewro çîyê ke Şengal de benî, nêbîyênê. Eke ewro Şengal payan ser de bo, no saya Ocalanî de yo.”

Newroze zaf muhîm a

Onderî bale ant muhîmîya Newroza 2017î ser û wina va: “Sîstem waşt ke wina nîşan bido ke mabênê şarê kurd û temsîlkaran de mesafeyêk gird bivirazo. No derheq de belkî bi hezaran kasetî rafanê merkezanê şerê taybetî de estî û nê kasetan bedilnenî û pêsero pêsero cinenî. Labelê emser Newroze û referandûm raştê yewbînan ameyî. Cok ra ganî ma Newroze bi hawayo bihêz, pîroz bikerî. Cok ra Newroze qasê nan û awe muhîm a.” 


SALMAN GOZELYUZ / KENAN KIRKAYA / DÎHABER / ANQARA