Endama Konseyê Caardişî ya KCKyî Fatma Adir derheqê bimbarekînanê Newroza 2017î de ANF rê qisey kerd û kesê ke tewrê bimbarekînan bî selamî kerd. Adir aşkere kerd ke Newroz fotografê neteweya demokratîke vet werte. Herayîya qiseyanê Fatma Adir ma bi şima ra bare kenê:
Newroze bîye Çîyager. Newroza Amedî vatişê embazê Çîyagerî ke vatbî ‘Se beno wa bibo, peynî do muhteşem bibo’ raşt vet. Embaz Çîyager vera qirkerdişê faşîst û qirkerdişî de bî beyraq û sembol û xo ant hetê Mazlum, Zekîye û Rahşanan; xo ant hetê kurdan, şaran, cinîyan, ciwanan û Semayanê merdimîyan. Her çiqas ke ame astengkerdiş zî Embaz Çîyager, Newroza Amedî de cayêko heq kerdo de û tam wextê xo de bi vatişê ‘ez tîya de ya, mi, ma heme qezenç kerd’ cayê xo girewt.Newroza 2017î nîşanê ma daye ke peynî ver bi muhteşemîye şona û vernîya şaro ke ver bi serkewtişî şono de ti hêz nêşêno bivindero.
Cizîr yewna rey bi rih, tarîx, kultur
Şar Newroze de pêro pîya bi hawayo ‘PKK şar o, şar zî tîya de yo’ qîra. Sloganê ‘Şehîd namirin’ û ‘Bicuye Rayber Apo’, yê ke vatêne ‘Aşma nîsane de do ti kes nêşênbo nameyê PKKyî bigiro fekê xo’ rê bîye şekmat û rîyê înan gina. Cizîr yewna rey bîy ruh, tarîx, kultur, nasname, şexs, vindetiş, rûmet, têkoşîn û ameyoxa şarî. Cizîr yewna rey bî Botan. Botan yewna rey bi Cizîrî reyde îftîxar kerd. Şarê kurd yewna rey Cizîr ser ro hîsin bî, kêfa şarî ame û şar yewna rey ard ziwan ke ê do têk nêşêrî û payan ser de bivinderî; cok ra vatî ‘ma do serbikewî’.
‘Ma do sere nêronî’
Cizîr yewna rey bî temsîlkarê welatperwerî û bî şopdarê Mehmet Tunç, Asya, Sêvê û bi hezaran şehîdê ke Mem û Zînê hemdem î. Vengê Mehmet Tunçî yo ke bi vatişê ‘Ma do sere nêronî’ û ‘No têkoşîn do bi tesilî serbikewo’ yewna rey Cizîr de olan da. Rasteyê Newroze yê Cizîrî de qetilkar û dagîrkerî yewna rey vînî kerdî. Yê ke xover dayî û têkoşîn meşnayî, qezenç kerdî. Şaro ke Newroze reyde bîyo yew, vindetişê nê şarî yê newrozanê heme cayan de muhteşem bî. Vakurê Kurdistanî de Wan, Colemêrg, Êlih, Dîlok, Dêrsim, Agirî, Qoser, Gever, Muş û sewbîna desan cayan de çîyê ke televîzyon de nêasayî zî bîbî. Metropolê Tirkîya vindetişê xo yê têkoşîn û xoverdayîşî bi hawayo baş nîşan da. Kurdistano ke dagîrkeran vatênê qey parçe bîyo, şarê ma her çar parçeyanê Kurdistanî de bî yewe, bi zerrî û vindetişêk vejîyayî rasteyan.
Fotografê neteweya demokratîke
Newroza Rojawanî fotografê neteweya demokratîka ke şorişê Rojawanî ra dima vejîya nîşanê ma da. Başûrê Kurdistanî de bêmaben yew hewte pîrozkerdişê Newroze domîya. Adirê Newroze ke Rojhelatê Kurdistanî de ame tavistiş, germî û roşnîya adirê Newroze heme Kurdistanî roşn kerd. Adiro ke Koyê Şengalî de ame tavistiş, nameyê bi xoverdayîş newe ra xelq bîyayîşî bî. Dîmenê ke heme cayanê Kurdistanî ra ameyî, nîşanê îlankerdişê yewîya neteweyî bî. Vera peymana menfîetê dagîrker, qetilkar û îxanetî de vindetişêko neteweyî bî.
Fotografê 21ê Adare 2017, vindetişê şaro ke qerarê azadî girewtbî bî. Şaro ke hîle û pîle zaf dîyo, ameyo qetilkerdiş, surgin bîyo, keye, dewe û bajarê înan ameyî rijnayîş, zana bîyo û îradeya xo gird kerdo û Newroze de nêyî girewt bin temînatî. Na Newroze de vindetişê şarî bi şîyarê ‘Ma do bi tesilî qezenç bikerî’ bîye yewe. Şaro ke azadîye ser o qerardar o, nîşan da ke qerarê ameyoxêka azade û demokratîke û îradeya xo ra peyser game nêerzeno. Reyna nîşan da ke tecrîd û hêrişo ke vera Rayberê Şarê Kurdî de benî qebul nêkeno. Şarî Newroze de nîşanê her kesî da ke ê do tewqîfkerdiş, operasyon û qetlîyaman qebul nêkerî. Vindetişêko Newroze de ame nîşandayîş, nawit ke do referandûm de bi hawayo gird ‘Nê’ bêro vatiş.
‘Vindertiş çin o’
Xoverdayîşo ke rasteyanê Newroze de ame nîşandayîş yewna rey bi ma da famkerdiş ke bi xoverdayîş û têkoşîn merdim tim eşkeno qezenç bikero. O wext vindetiş çin o. Ma do 16ê Nîsane de sey hêzê demokratîk vera polîtîkayanê faşîzm, qirkerdiş û qetlîyaman yê îqtîdarê AKP û MHPyî de vindetişêko lazim o ma nîşan bidî. Ê wazenî bingeyê cuya ortaxe, azadî û demokrasî orte ra wedarnî, labelê hêzê şarî do têkşîyayîş bi înan bido cuyayîş. No referandûm zî do bibo wesîle. Yew na rey ameyo famkerdiş ke şar layîqê demokrasî û azadî yo. Ez vana wa yewna rey Newroze pîroz bo! Ez vindetişo ke ame nîşandayîş ver şarî pîroz kena.
ANF/BEHDÎNAN
Xelesyayîş nezdî yo
Hemserokîye Konseyê Rayverîn ê KCK derheqê bimbarek kerdenanê Newrozî de yew mesaja niştkî da. KCK şaro ke tewrê şayîyanê Newrozî bî selamî kerd. Mesaj de vajîya ke Newroza 2017’î mîyet her kesî ke, kes nêşkeno îradeyê azade bişikîno.
KCK vist vîrî ke îtîfaqê faşîstîn ê AKP-MHP di serrî yo polîtîkayê çokrodayîşî ferz keno û hîrayinê eşkerakerdiş de hina vajîya: “Nê polîtîkayê leymin (qilêrîn) hetê şarê ma ra, Newroza emserr de xilxilîyayî. Îtîfaqê AKP-MHP ra pîya pêroyê paştgeranê ci zî kerd vîne. Şexs dê Amed û Cîzîr de, şarê Kurd miyet pêroyê dost û dişmenî ke,endî kes nêşkeno vernîyê înan bigîro. Şarê Newroz bi siloganê 'Ma teqez qezenc kene' hinî eşkera fîna çiman ver ke, faşîstî nêşkenî xoverdayîşê înan bişikînê.”
‘Vatişê ‘Nê’yî qezenc keno’
Îzahatî de vistîya vîrî ke Newroza emserr mîjdanîye nezdîbiyayîşê xelesyayîşî da û aşkere kerd ke na Newroz de raştîye şarî zaf quwetin vejîya ver çiman. KCK aşkere kerd ke şarî bi Newroza emserrî sîleyêk (lapata) giran da zilmî ro û va, ‘Newroz eşkera damûsna ke, Kurdistan ra heta Tirkîye, vera dîktatorî vatişê ‘Nê’ qezenc keno.’ KCK, şaro ke bi siloganê “Bicuwe Rayver Apo” û “PKK şaro, şar îta de yo” qîriya û meydanan de wayîrê mirasê xo vejîya, selamî kerd û sozê serkewtişî da.
BEHDÎNAN