Welatijê Amedî, Mayanê Haştî û sîyasetmedarê ke derheqê vengdayişê Ocalanî de qisey kerdî ardî ser ziwan ke ê pey pêşnîyazanê rayverê xo de yê.
Rayverê Şarê Kurd Abdullah Ocalanî pêdiyayinê 11ê Êlûnê bi birayê xo Mehmet Ocalanî de aşkere kerd ke ‘eke dewlet gam bierzo 6 aşmî de mesele hal bena’. Seba na gama nîyeta rind yê Ocalanî çormeyanê hera ra paştdayişî yenê. Welatijê Amedî zî derheqê na vengdayiş de fikrê xo ardî ser ziwan û aşkere kerdî ke ê pey mesajanê rayverê xo de yê.
Pêşnîyazê Ocalanî raya kaosî ra vetiş ê
Welatijan ra Alî Derîn ke viraştişê pêdiyayinî zey gameke rind dî û hayr ant bi muzakereyan halkerdişê meseleyan ser. Derînî aşkere kerd ke eke Erdogan û hikûmet wazenê ke haştî bîro ganî cewab bidê vatenanê Ocalanî û gam bierzê. Welatij Alî Derînî vist vîrî ke eke bi lejî cewab bidê mesaja Ocalanî iyê dê xover bidê û va tecrîdê verra Ocalanî de israr kerdiş kesî rê nêdano qezençkerdiş.
Xebat Baranî zî ard ser ziwan ke vengdayişê Rayverê Şarê Kurd Abdullah Ocalanî omidekê newî yo û va raya kaosî ra vejyayişî pêşnîyazanê Ocalanî ra vêreno. Baranî vist vîrî ke pêvacoyê çarekerdişê verên rîwalê bêsamîmîyetîya dewlet qedîya û wina va: “Eke dewlet samîmî nezdî bibîya do mesele nêameybîya na roj. Ganî bi viraştişê makeqanûna newî meseleya kurd bîro halkerdiş. Ganî çarekerdişî de rolê Ocalanî ke xîtabê bi mîlyonan keno bîro quwetkerdişî.
‘Kar, werdiş nê haştî wazenime’
Welatijê 56 serre Alî Încî zî persa ‘bi lej û merdiş heta kotî şiyîyeno’ kerd û va: “Ma înan ra kar û werdişî nêwazenê. Tenya haştî wazenime. Ganî ser vengdayişê Ocalanî dewlet zî gam bierzo.” Saît Arcanli zî aşkere kerd ke o tewrê pêşnîyazê ‘6 aşmî de mesele hal bena’ yê Ocalanî beno û da zonayen ke nika dorê gameştiş yê dewlet o. Arcanli ard ser ziwan ke ganî pêdiyayin bi nayî ra sînor nêmano.
Stenbol de zî Mayê Haştî ke no hefte zî ver Seraya Dolmabahçe de amey têlewe waştî ke mesaja çarekerdişî yê Ocalanî rê cewab bîro dayen. Mayê ke panqarta ‘Lejî rê destûr nêdanime’ akerdî waştî ke maseyê Dolmabahçe reyna ra bîro ronayen.
Ocalanî vengdayişê teslîmîyetî peyser pisikna
Seba vengdayişê Ocalanî jû paştdayen zî vatoxê HDK Ertûgrûl Kurkçu ra amê. Kurkçu vist vîrî ke Birêz Ocalanî vengdayişê teslîmbîyayişî bi tersê destê xo peyser pisikna û va, vengdayişê Ocalanî dewlet ra zîyade seba çormeyê demokrasî, haştî û azadîwaştî yê. Vatoxê HDK Kurkçu da zonayen ke ceba cewabdayişê vengdayişa Ocalanî dewlet wayîrê hadreyînê polîtîk nîya. Kurkçu aşkere kerd ke dewlet bi cidîbîyayen nezdîyê mesele nêbena û va: “Ocalanî verîya coy zî aya kerd ke hikûmet çarenêkerdişî de israr kena.” Kurkçu da zonayen ke 15ê Temmuz ra dima PKK herbê mîyanî manî kerd la bi eştişê qayyûman AKP welatî kirêşnena herbê mîyanî. Kurkçu aşkere kerd ke ser qontragerîlayanê Kurdistan de Erdogan esto û wina dewam kerd: “Erdogan bi nê qontragerîlayan wazeno Kurdistan reyna kolonî bikero. La îmkanê nayî çinyo. Ya qayyûmî dê şirê, ya zî pirodayişî ramenê.” Kurkçu tewr peynî de hayr ant hewcedarîyê xopawitişî ser.
Wezîfe yê dewlet o
Vatoxê Blokê Haştî Bahadir Altan û îdarekarê Weqfa Haştî Hakan Tahmazî zî aşkere kerdî ke mesaja Ocalanî yena maneya jû rojî de vindernayişê gonî û va wezîfeyê sifteyin yê dewlet o. Altanî hayr ant vatişanê sermîyananê dewlet yê ‘çarekerdiş çinyo’ ser û va no ser sûcî de tepişnayiş o. Altanî aşkere kerd ke mesaja Ocalanî hetê sîyasetî nîro qebûlkerdiş zî hetê şaran do qebûl bivîno û va çîyo ke herbî bido vindernayen vatişê endî bes o yê şarê Tirkîye yo.
Îdarekarê Weqfa Haştî Hakan Tahmazî zî da zonayen ke faktoro ke demê haştî manî keno tecrîd o û va no nîno qebûlkerdiş. Tahmazî va eke çarekerdiş yeno waşten se ganî qedexeyê pêdiyayişî wedarîyo û wina dewam kerd: “Çîyo ke bîro kerden çîyê ke xîzmetê normalîzasyonê Tirkîye bikerê yê. Ganî vera HDP herekatê qirkerdişê sîyasî vindî yo. Ganî dewlet cewabekê rind bido vengdayişê Ocalanî.
NAVENDÊ XEBERAN