2 rojî verê endamê Meclîsê Partîye yê HDP û Verfekê Tevgerê 78an Celalettîn Can û 8 sîyasetmedarê bînî tehlîye bîyî. Sîyasetmedarî Zîndanê Sîlîvrî ra tehlîye bîyî. Xeylê kesî şîyî sîyasetmedaran vera û Canî berê zîndanî ver de qisey kerd.
Canî dîyar kerd ke goreyê nizdîbîyayîşê heyetê mehkeme ê vatêne qey o do tehlîye nêbo û wina va: “Heqîqeten de çîyêk destê înan de çinêbi. Mehkeme de heme îdîayê înan veng ameyî vetene. Ê mecbûr mendî ke serbest veradî. Zere de embazê ma yê tewqîfbîyaye estî û şert û mercê zehmetinan de manenî. Zafaneyê tewqîfbîyayeyan bi hawayo kêfî ameyî tewqîf kerdene û paweyê azadîya xo yî. Seba mi kampanyayêka hîra ameye kerdene. Labelê ganî na kampanya hîra bibo û seba heme hepsîyan bêro kerdene. Nika wext wextê seba hepsîyan ‘Kampanyaya azadîya hepsîyan’ dayîşê dest pêkerdene yo.”
Heto bîn ra Hemsereka Şaredarîya Pasurî ya Amedî Sadîye Suer Barana ke zîndanê Osmanîye de manena, bi rayîrê kênaya xo Melek Barane qala zext û tedayanê zîndanî kerde. Kêna Barane va ‘dayîka mi û 3 hepsîyê bînî hetê gardîyanan ra ameyî derb kerdene’ û wina dewam kerde: “Herinda derban hîna zî vucûdê hepsîyan de estî. Ganî herkes wayîrê hepsîyanê cinîyan yê Osmanîye bivejîyo. Beno ke siba erey bibo, wa herkes bikewo têgêrayîşî mîyan.”
10 aşmî yo paweyê îdîaname ya
Hemsereka Şaredarîya Pîranî ya Amedî Zulfîye Kîşmîre 10 aşmî yo tewqîfkerde ya û hîna zî îdîanameyê aye nêameyo amade kerdene. Keyeyê Kîşmîre qisey kerd û melumatî dayî. Kênaya aye Melîke Kîşmîre dîyar kerde ke dayîka aye sebebanê sîyasîyan ver ameya tewqîf kerdene û wina va: “Heta nika avûkatî ra vatî ‘hîna ganî 3 kesê bînî zî bêrî tewqîf kerdene û ma do dima ra qerar bidî’. Wa mehkeme dîyar bibo. Ma dewlete ra çîyêk nêpawenî.”
AMED