Unîversîteyê Mersînî û Mudurîya Asayîşî ya Mersînî qetlîyamê Pirsûsî yê 20ê temuze ra nata derheqê bi seyan wendekaran de tehqîqat dayî destpêkerdiş. Heta nika pêro pîya derheqê 373 kesan de doze ameya akerdiş, reyna 72 kesî zî 1 aşme ra heta 3 termînan unîversîteyî ra ameyî eştiş. Heto bîn ra Ûnîversîteyê Mersînî ra 10 wendekarî zî nika tewqîfkerde yî. Babete ser o wendekarî qisey kerdî.
Wendekarê muxalîfî hedef de yî
Fakulteya Fen Edebîyatî de Beşa Tarîxî ra Ersîn Aydino ke pola 4. de waneno, qisey kerd û wina va: “Nika derheqê mi de 6 doze û 7 tehqîqatê ke hetê rektorîye ra ameyî akerdiş estî. Nê welatî prosesê Gezî û Kobanêyî dîyo û nê prosesan de wendekarê ke aktîf bîyî ameyî hedef girewtiş. Unîversîteyê Mersînî de zext û tedayî bi taybetî 11ê kanûne de, wexto ke faşîstî waştî ke Nîhal Atsizî vîr bîyarî û wendekarê welatperwerî nêverdayî ra dima dest pêkerdî. Zaf wendekarî unîversîteyî ra ameyî eştiş û ti kes nînan nêzano. Ma ancax eşkenî mil bidî yewbînan û nê rojanê zehmetinan pey xo de verabidî.”
Zextî kur benî
Fakulteya Fen Edebîyatî de Mahmut Gulo ke Pola 2. de waneno zî 1 termînî unîversîteyî ra ameyo eştiş. Gulî wina va: “Polîsê sîvîlî mîyanê unîversîteyî de sîlehanê xo masa ser de ronenî û rektor zî ma ra vano ‘ganî şima bi rehetî boye nêgîrî; zere de polîsî estî, teber de zî ajanê mi û domanê mi yê faşîstî estî.’ Unîversîte de zaf wendekarî seba ke rastê tehqîqat û cezayan ameyî, nêşkenî bikewî unîversîteyî. Ê eşkenî kewtişê ma yê unîversîteyî asteng bikerî, la nêşkenî rêxistine bîyayîşê ma asteng bikerî. Eke ma bêrî têhet, ti kes nêşkeno ma ver de bivindero. Çimkî ma lajê şarî yî.”
DÎHABER / MERSÎN