Paytexta Almanya Berlîn de nûmayişî çormeyanê demokratîk bêmavên ramenê. Sûk de her roj nûmayişê protestoyî virazîyenê. Roja verî zî hezar ra vêşêr kesî seat 17.00 de Brandenburger Tor de are bî û heta ver banê Parlemento û Serokîye ray şî.
Mitîngo ke ver Parlementoyê Federal de virazîya de parlementerê Partîya Çep Andrej Hunko, Dîether Dehm û rojnameger Nîck Braunsî qisey kerdî û derbeya AKP-Erdoganî rê nêrazîbîyayişî damûsnay.
Ganî Almanya no şermî ra desinde bixelesîyo
Hunko aşkere kerd ke no herbê qilêrîn de o şarê Kurd het de yo. Andrej Hunko hayr ant vindernayişê muzakereyanê endamtîya Yewbîyîna Awrûpa yê Tirkîye ser û va, ‘heta ke Tirkîye de sîstemekê demokratîk ronîyo şert o ke pere û paştdayişo ke şino Tirkîye vindernîyo. Hunko ard ziwan ke polîtîkaya Almanya sosret û şerm a û waşt ke Almanya desinde no şermî ra bixelesîyo. Sûk de dûştê operasyonanê qirkerdenî nûmayişî dê dewam bikerê.
Sûka bîn yê Almanya Wesel de zî operasyonê qirkerdişî bi yew rayşîyayiş û mitîngî protesto bî. Nûmayişo ke hetê Wesel Mala Ezidîyan ra ame organîzekerdiş Berlîner Tor de verşanê roja Çarşem de virazîya. Ser nameyê Partîya Çep (Dîe Lînke) Barbara Wagner, ser nameyê Mala Ezidîyan Bîrsan Çelîk û Salatîn Tagay qisey kerdî û hewldayenê qirkerdişî yê AKP rê nêrazîbîyayiş damûsnîya. Nûmayiş de sloganê “HDP ma yê”, “Kiştoş Erdogan” qîriyîyay.
Munîh de nûmayişê bêîtatîya sivîl
Îstasyonê Tren yê sûka Almanya Munîh de zî nûmayişê bêîtatîya sivîl virazîya. Nûmayişo ke hetê ‘Maseyê Krîzî’ ame organîzekerdiş de hayr ancîya atmosferê sîyasî yê Tirkîye ser. Qisey û sloganan de hikûmeta AKP amê îqaz kerdiş û wazîya ke desince kerdenanê derbe ra fek veradîyo.
Sûka bîn yê Almanya Darmstadt de zî hezar ra vêşî kesî rexmê varayişê varonî ray şî. Hemwelatijanê Almanya zî paştî day nûmayişî. Hemwelatijê Alman ke 70 serrî yo Ulrich Klîngmeîer zî ser kursî de tewrê nûmayiş bi û paştdayişê xo yê seba HDP damûsna. Nûmayiş bi slogananê “HDP rûmetê ma yo”, “TC ya îşgalker Kurdistan ra def bi” qedîya.
Kaîserslautern de zî derheqê qewimyayiş de standa enformasyon abîya û doste dîyay xêlê dezgehan. Standa enformasyon ke raştê eleqeyê gird amê do çend rojanê bîn zî bîro ronayen. Kurdistanijî şî zîyaretê buroyanê partîyanê sîyasî, dezgehanê çapemenî, dêr û xêlê cayan û derheqê qewimyayişanê Tirkîye de dosya day sermîyanan.
“Erdoganî vindarnê”
Sûka Almanya Marbûrg de zî cenîyanê ciwan xêlê cayanê sûk de panqartê zey “HDP omidê cenîyan o”, “Bi HDP paştîdayiş-Xoverdayiş ciwîyayiş o” operasyonanê sîyasî rê nêrazîbîyen damûsnîya. Herzewbîn bi spreyan ser dêsan de “Jin, Jiyan, Azadî“ nuştî.
Paytexta Swêd Stockholm de zî cenîyanê Kurd seba wayîrvejyayişê HDP navendê sûk de nûmayişeke viraşt. Nûmayişkaran resîmê wekîlê ke amey tepiştiş wedarnay û panqartê “Dest mede wekîlanê ma”, “Erdoganî vindarnê, qehirbo faşîzm” akerdî û vilavokî kerdî vila.
Ver MY ra veng day
Sûka Swîsre Cenew de zî ver banê Mîletê Yewbîyayî de derbeya Erdoganî protesto bî. Parlementera Partîya Sosyalîst yê Swîsre (SP) Laûrence Rîelle Fehlmann û temsîlkarê Cepheyê Şar yê Tûnis Anis Mansourî zî tewrê nûmayiş bî û mesajanê xo day. Qiseyan de vajîya ke hêrişê dûştê HDP qet nînê qebûl kerdişî. Nûmayiş bi slogananê “Kiştox Erdogan”, “HDP rûmetê ma yo” qedîya.
Sûka Fransa Marsîlya de bi pêşengtîya Meclîsa Cenîyan yê Arîn Mîrkan de mitîngeke virazîya. Mîtînga ke ver bana walitî de amê viraştiş de faşîzmê AKP protesto bi. Nûmayiş de mesaja berzkerdişê xoverdayişî amê dayen.
NAVENDÊ XEBERAN