Dewleta AKP 13’ê meng de, Qezaya Mêrdîn Nisêbîn de vejiyayişê kûçeyan kerd ‘qedexe’. Qedexe ra piya, bi tifinganê gird eşt welatijan ser. Wast îradeyê şarê Nisêbîn bişikîno û înan teslîm bigîro. La belê cayê serhewadayin û xoverdayişan Nisêbîn verra êrişanê dewlet serreyê xo nimiz nêkerd û teslîm nêbi. Şarê Nisêbînijan 7’î ra heta 70 serrî, deqeyê siftayin ê ‘qedexe’ û êrişî ra na kişt, xo ver da.
9 welatijî kişiyay
Qedexeyê vejiyayinê kûçeyan, tam 14 rojan ramit. Qorê siftayino ‘qedexe’ yê vejiyayişê kûçeyan hendayê derg vîniyeno. Çeteyanê dewleta AKP, enê 14 rojan miyan de, 9 welatijê sivîlî kiştî. Eynî wext de 19 welatijê sivîlî jî kerdî dirbetin. Polîs, tîmê teybet û lejkeran bi tifinganê giran û tanqan eşt şarî ser. Çeteyan, bi taybetî zî mehle-taxanê Abdulkadîrpaşa, Firat, Dîcle û Yenîşehîr hedef girotî. Nê taxan de aw ra piya xetê ceyran, telefon û înternetî zî birnay. Dewleta Tirk se kerd, nêşa îradeyê şarê Nisêbîn bişikîno û înan teslîm bigîro. Şarê Nisêbîn rojê 13. ê ‘qedexe’ de vejiya kûçeyan û fiîlî de de qedexe hewada. Rayverîna Tirk zî enê xoverdayişî ser, peyser gam eşt û qerarê hewadayinê ‘qedexe’ da. Badê Nisêbîn dewlet, no reynî zî qezayê bîn yê Mêrdîn Dêrik de ‘qedexe’yê jû rojî îlan kerd.
Cenaze defin bî
Heta bîn ra cenazeyê 5 welatijê ke zerreyê 14 rojan de hedê çeteyanê AKP kişiyay, hetê des hezaran kesan defin bî. Cenazeyê Nurhan Kaplan, Sedat Gungor, Mansur Aslan, Şerîf Alper û yê Hasan Dal’î bi sloganê ‘PKK şar o, şar îta de ro’, ‘Heyfgirotin’, ‘Kurdistan do faşîzmê ra bibo mezel’ amey definkerdin.
NISÊBÎN/ANF