Taxanê Firat, Abdulkadîrpaşa, Yenîşehîr û Dîcle de şewa verî vengê pirodayişan nêbirniya. Pirodayişan de jû wesayîta zirxî ya tîpê ejder îmha bî. Vizêr seatanê sodir de teqînayişî qewimiya û ambûlansî sewq bî.
Tanqê ke meydanê Newroz û Îpekyolû de bi ca bî, top eştî vera taxa Firat’î. Xêlê keyeyan ra dûmanê siya berz bî. Herzewbîn tabûra eskerî ya Taxa Yenîşehîr ra zî vera taxanê Dîcle, Firat û Abdulkadîrpaşa hewanî erziyay. Hewanî kewtî cayanê sivîlan. Nê pêrokîn mehleyan de vera êrişanê dewlet xoverdayiş rameno.
200 welatijî bi qetlîam ra rî bi rî yê
Jew cayo bîn ke ablûqa û terorê dewlet rameno Gever o. Qezaya Colemerg Gever de zî dewlet destpa êrişan kerd. Vizêr qûwetanê dewlet bi guleyanê raşt û bombeyanê gaz eşt welatijan ser û di kesî kerd dirbetin. Hîrê gencî zî girotiyay bin çiman.
Qeza de taxa Zagroz ke hedefê êrişanê dewlet de ya de 200 welatijî keyeyê xo de bin bombevornayen de yê. Zereyê nê kesan de qeçekî, cenî, kal û pîrî zî estê. Rexmo ke qûwetê dewlet nayî zanê, êrişanê xo ramenê.
Serva vindernayişê bombevornayenê vera taxa Zagroz, dewanê Bajirge ra di hezar welatijî kewtî ray. La tîmanê JOH dewa Kelê de verniya welatijan girot û bi bombeyanê gaz û guleyanê raşt êrişê welatijan kerdî. Netîce de di welatijî bî dirbetin. Vera êrişanê qûwetanê dewlet Geverijan barîqatî ronay û destpa xoverdayiş kerdî.
DÎHA/MÊRDÎN/GEVER