Dewleta tirk, a ke verra îsraîl, rûsya, amerîqa serreyê xo kena nimiz, verra kurdan konseptê herbê topyekûn visto dewre. Serçete Dawûtoglu xo bi xo deşîfre kerd ke, no konsept 2013î de ameyo hadre kerdin. Çarçoweyê no konseptî de, bakûrê kurdistan de herbê do bê sînor, xeyrî-exlaqî yeno ramiten. AKP serva ke şarê kurd teslîm bigîro, heme îmkanê dewlet visto dewre. Kurdê ke heqê tewr meşrû statû û xoserî wazenê bi merdiş yenê cezakerdin.
Dewleta romî, zey terteleyê 1925, 1938, Zîlan, Koçgirî, Agirî, Mereş şarê kurd rê qirkerdinê newî ferz kena. Nê rojanê serragêra qetlîama Mereş'î de, hewl danê qetlîamê newî virazê. Planê Îslahatê Şerq ferz kena. Çarçoveyê na plana ke 1925î de vistî dewre, 100 hezar ra jêde-vêşî kurdî amey qirkerden. Nika zî reyna ra wazenê kurdan qir, sirgûn û asîmîle bikerê. Dîktatorê dergî fermanê newî da û pêrokîn artêşî, bi tanq û topan sewqê kurdistan kerd. Şarê sivîlî, cenî, domanî yenê qetilkerdin. Keyeyan bombevaran kenê. Kurdan ra teslîmiyet yeno waşten. Serçete Dawûtoglu aşkere kerd ke, heta ke kurdî îtatê dewlet bikerê, qûwetê dewlet dê kurdistan ra nêvejiyê. No serçeteyî herzewbîn îdia kerd ke, no herb û pêrokîn qetlîamê sivîlan çarçoveyê 'qaîdeyanê hiqûq' de viraziyenê.
Çiyo ke ma nê vatişan ra fehm bikerê no yo. Dewleta tirk verra kurdan qerarê xo dayo. Do herb bikero, bikişo, gonî birijno. Verra nay gerek tenya çend sûkî nê, pêrokîn kurdî zî qerarê netewî bigîrê. Gune pêrokîn kurdistan zey Cizîr, Nisêbîn, Sîlopî, Sûr, Kerboran wayrê kurdatiya xo bivejiyo. Dewlet rîwalê ke, kurdî xosereya xo, hardê xo, ziwanê xo, kamiya xo wazenê, tanq û topan sewq kerd. Na dewleta zilimkar, se serriyo kurdan rê nefes nêdana. Vanê kam ke sereyê xo hewado, ma dê sereyê înan bikuwê. Cizîr, Sûr, Nisêbîn wayrê rûmeta kurdatî, wayrê erjiyayenanê xo vejiyenê. Çike zanê ke, bê azadî û sîstema demokratîk, cuyayiş nêbeno. Çi ke xoverdayiş cuwuyayişo.
Rayê kurdistan û tirkiye rewna ra pê ra abiryayê. Raştî zî birabiyena winayîn nêbena. Vanê ma dê serdestê şima bê, şima dê koleyê ma bê. Xo ra ne na dewlet jû roj kurdan zey hemwelatijê xo dî, ne zî şarê tirk kurdan zey wa û birayê xo qebûl kerd. Tenya çarçoveyê hiqûqa dişmentî de nezdiyê kurdan benê. Bi aşmano kurdistan veşeno, la çima kişta tirkiye ra nêrazîbiyenî nînê. Nayî ra, gerek şarê kurd verra konseptê herbî pêro piya werzê ser payan û zilimkaran ra vajê endî beso.
No adiro ke kurdistan veşneno, do tirkiye zî biveşno. No herb tenya do bi kurdistan bi sînor nêmano, herzewbîn vilayê sûkanê tirkiye zî bibo. Heta ke, rejîma îşgalkerdox nêvindo, tirkiye zî do biveşo. Tarix de zî ayseno ke, îşgalkerdoxî, dîktatorî û faşîzm sernêkewno. Nayî ra faşîzma AKP zî nêşkena serkewo. Bi tanq û topan AKP peyniya xo ana. Nika verniya tirkiye de didi rayî estê Ya AKP do îstifa bikero, ya zî tirkiye zî do bi kurdistan ra piya biveşo. Çike hona gerîlayî fedaî yê kurd nêkewtê dewre.
Kurdistan rojanê tarixî ra ravêreno. Tarix her çî qeyd keno. Do xoverdayoxan ra piya, îxanetkaran û piyakarî zî qeyd bikero. Nê rojan de, bêvengî wertexiya sûcî ya. Verra zilmê Dehaq'an, verra zilmê Yezid'an, Mûaviye'yan, romiyan bêveng nêmame, kişta cepheyê şarê xo de ca bigîme. Rojê azad destê ma de yê û nezdiyê. No çerxê zulim do derg nêramo. Zorvajhi bakî nêbeno. Zilimkarî dê binkewê, dê vinî bikerê, çike nêheqî yê, sûcdarî yê.