Qezaya Amed Yenîşehîr de nobeda ke bi rayverîna KCD, DBP, HDP û KJA de destpa kerd rixmê OHAL Sumerpark de bi tewrbîyena desan kesan ramena. Qezaya Amed Rêzan de zî Nobeda Serbestî bi tewrbîyayena seyan welatijan Parqa Koşuyolu de dewam kerd. Welatijê ke sloganê “Bê Serok Weşî nêbeno” berz kerdî mesajê ‘heta ke tecrîd nêhewadîyo dê nûmayişî dewam bikerê’ day.
“Serbestîya Rayverîye serbestîya ma ya”
Çewlig de kî ‘Nobeda Azadî’ke bi rayverîna DBP, HDP û KJA de destpa kerd roja 12. de dewa Îbrahîman de dewam kerd. Azayê MP yê DBP Adnan Sari, Azaya Şûra ya DÎK Hatîce Kavran û azayê meclîsê şaredarî ra pîya xêlê kes tewrê nûmayiş bî. Nûmayiş de panqarta “Serbestîya Rayverîye serbestîya ma ya” bî a. Vizêr roja 13. de zî bi tewrbîyayena desan welatijan nûmayiş ramîya.
Nûmayişa bîn ke qezaya Çewlig Kanîreş de verîya 12 rojan destpa kerd ramena. Roja verî nûmayiş dewa Alawîzan de bi tewrbîyena aktivîstanê DBP, HDP, KCD û bi desan welatijan dewam kerd. Nûmayiş bi vîrardişê qetlîama Dîlok destpa kerd. Hemserokê qeza yê HDP Kuçuk Atli qetlîam lanet kerd û rîwalo xeber nêgirotişê Ocalanî ra gumanê xo ardî ser zon. Atli aşkere kerd ke heta ke Ocalanî ra xeber bîro girotiş dê meydanan de bê. Peycoy îdarekarê HDP yê qeza Alî Harmanci zî qisey kerd û hayr ant polîtîkayanê teberî yê Tirkîye ser û va ewro Esed û Erdogan ke vizêr dişmenî bî zey ke dezayê pêkerdî yê.
Êlihijî bi israr ê
Êlih de kî rixmê hewldayenanê manîkerdişê polîsan nûmayişa ‘Nobeda Azadî’ ke ver Sînemayê Yilmaz Guneyî de destpa kerd bi tewrbîyena seyan kesan ramena. Rixmê tehdîdê mudaxalekerdişî yê polîsan welatijî bi israreke gird nûmayişê xo ramenê û vanê heta ke tecrîd nêwedarîyo nûmayiş do biramo.
Qezaya Meletî Yazihan de kî startê ‘Nobeda Azadî’ ame dayen. Nûmayiş rîwalo ke teber de destûr nêamê dayen bana qeza yê HDP de destpa kerd. Hemserokê sûk yê HDP Îsa Yildirim vist vîrî ke sîstem babeda demokrasî de dirîyî kena û va, badê hewldayenê derbe bi rojan hetkaranê îxtidar nobedê demokrasî girotî, la nobedê HDP yenê manîkerden. Yildirimî waşt ke seba destpakerdişê muzakere tecrîdê ser Ocalanî desinde wedarîyo. Badê damûstayîn bana partî de nûmayiş destpa kerd.
NAVENDÊ XEBERAN