‘Pey dawa nêverdamê’
Pîyê Fîdan Dogan Hasan Dogan’î nûmayiş de qisey kerd û aşkere kerd ke, rexmo ke qetlîam serra 4. de ya, la hona nêamê roşnîkerden. Dogan’î ard ziwan ke, edaleta Fransa, tenya serva şarê Fransa ya, serva Kurdan niya. Temsîlkara şarê Tamîl Tîro zî ard ziwan ke, ê janê Kurdan rind fehm kenê û aşkere kerd ke, serva roşnîkerdişê qetlîam, ê dê Kurdan het de bê. Temsîlkara hereketê ceniyanê Kurd zî vist vîrî ke, wazenê ser qetlîama Parîs bigîrê û aşkere kerd ke, ê dê pey na dawa nêviradê. Nûmayiş de sloganê zey, ‘Kiştox Tirkiye, piyakar Fransa’, ‘Ma pêrokîn Sara, Rojbîn û Ronahî’ yê berz bî.
Almanya de nûmayişî
Sûka Almanya Dusseldorf de, nûmayişê edalet no hefte hetê Meclîsê Ceniyan yê Essen, ver konsolosxaneyê Fransa de viraziya. Nûmayişkaran resîmê Sakîne Cansiz, Fîdan Dogan û Leyla Şaylemez hewaday û waştî ke mesûlê qetlîam bîrê roşnî kerdin. Nûmayişkaran buroyê partiyanê SPD û CDÛ ziyaret kerdî û waştî ke vera qetilkerdişê Kurdan bêveng memanê.
Sûka Almanya Munîh de zî Kurdistanijî ver konsolosxaneyê Fransa de amey pêhet û slogana ‘Bêvengiya şima piyakariya şima ra ya’ berz kerdî. Nûmayişa ke hetê Komunê ceniyan ê Sara Kurd û Ciwanên Azad viraziya bi sloganan qediya.
ANF/NAVENDÊ XEBERAN