Çalakîya grevê vêşanî ya Nurîye Gulmene û Semîh Ozakçayî ke bi Qerarnameyê Hukmê Qanûnî (KHK) karî ra ameybî eştiş û seba ke biagêrî karê xo, daybî destpêkerdiş roja xo ya 203. de dewam kena. Gulmene û Ozakça roja 76. ya grevê vêşanî ra nata zîndan de yî û çend hewte yo ke neqlê Nêweşxaneyê Zîndanê Sîncanî de mendênê.
Ame musayîş ke Akademîsyene Nurîye Gulmene seatanê şewe de neqlê beşa lezgîne ya Nêweşxaneyê Numune yê Anqara bîya. Gulmena ke şewe saete 3.30 de bi hawayo zorî odeyê xo ra ameya vetiş, neqlê nêweşxaneyî bîya. Reyna ame musayîş ke destûr nêdîyeno ke doktorê ke Odeyê Tabîban yê Anqara de yî, nêzikê Gulmene bibî.
Goreyê melumatan wexto ke Gulmene neqlê nêweşxaneyî bena, aye vîste de waya xo Beyza Gulmene reyde ode de kitab wendêne.
Destûr nêdanî ke ma nizdî bibî
Babete ser o avûkate Aytul Kaplane qisey kerde. Kaplane va ‘hişê Gulmene akerde yo’ û wina dewam kerde: “Eke nêberdêne nêweşxane, do beşdarê mehkeme bibîyêne.”Doktorê Gulmene û Îdarekarê ATOye Onur Karahanî zî va ‘nika ra pey Gulmene do beşa lezgîne de bimana û ewja de binê kontrolî de bimana’ û wina domna: “Labelê destûr nêdanî ke ma nizdîyê aye bibî.”
Seke yeno zanayîş ke Gulmene waştbî ke beşdarê doze biba.
ANF/ANQARA