Çalakîya grevê vêşanî ya Nurîye Gulmene û Semîh Ozakçayî roja 183. de dewam kena. Gulmene û Ozakçayê ke roja 76. ya grevê vêşanî de ameybî tepiştiş û dima ra tewqîf bîbîy, nika Nêweşxaneyê Zîndanê Sîncanî de manenî û rewşa Gulmene û Ozakçayî zî baş nîya.
Heto bîn ra her roje hem seba piştîdayîşê Gulmene û Ozakçayî û hem zî tepîya agêrayîşê karê xo, Caddeyê Yukselî de çalakîye yena viraştiş û na çalakîye zî roja xo ya 303. de dewam kena. Her roje çalakgerî seba ke bi îzehetêk piştî bidîy Gulmene û Ozakçayî, Ziqaqê Konurî de yenî têhet û ver bi Caddeyê Yukselî de meşîyenî, labelê dima ra raştê hêrişê polîsan yenî û yenî tepiştiş. Labelê reyna zî çalakgerî çalakîya xo ra fek veranêdanî. Heto bîn ra çalakîya grevê vêşanî ya Esra Ozakçaya ke wextê tewqîfbîyayîşê Gulmene û Ozakçayî de dest bi grevê vêşanî kerdbî zî roja xo ya 107. de dewam kena.
Seke yeno zanayîş çend rojî verê roja mehkemeya Gulmene û Ozakçayî dîyar bîybî û Gulmene û Ozakça do 14ê êlule Edlîyeya Anqara de bivejyî hakimî ver. Avûkatê Gulmene û Semîhî dîyar kerdî ke seba mehkeme de amadebîyayîşê Nurîye û Semîhî nuşteyê mehkemeye esto.
ANQARA