Çalakîya grevê vêşanî ya Nurîye Gulmene û Semîh Ozakçayî ke seba agêrayîşê karê xo daybî destpêkerdiş, roja xo ya 198. de dewam kena. Gulmene û Ozakça roja 76. ya grevê vêşanî ra nata zîndan de yî û nika Nêweşxaneyê Zîndanê Sîncanî de yenî tepiştiş.
Babete ser o Endama Heyetê Îdareyî yê Egîtîm-Senî ya Şûbeya Amedî ya Humare 1î Hatîce Efeye qisey kerde.
Efeye va ‘wazenî perwerdekaran îxraç bikerî û bi no hawa teslîm bigîrî’ û wina dewam kerde: “No proses de huqûq ame îxlalkerdiş. Bi sehezaran kesî ameyî îxraçkerdiş û bi mîlyonan kesî zî zorî mîyan de cuyenî. Dewlete hewl dana bi nê raybazan îdeolojîyê xo hakim bikera. Labelê wa ê bizanî ke Nurîye û Semîh tena nîyî û ma do fek têkoşînê xo ra veranêdî.”
Avûkatê Gulmene û Ozakçayî tewqîf bîyî
Seke yeno zanayîş ke çend rojî verê mehkemeya Gulmene û Ozakçayî estbî û her di zî serbest nêameyî veradayîş. Heto bîn ra mehkeme ra ver polîsan avûkatanê Gulmene û Ozakçayî tepiştbî. Avûkatê ke ameybî tepiştiş sewqê edlîye ameybî kerdiş û nînan ra 14 avûkatî tewqîf bîyî. Avûkatê ke ameyî tewqîfbîyayîş nê yî: “Dîdem Baydare, Şukrîye Erdene, Ayşegul Çagataye, Ebru Tîmtîk, Aytaç Unsal, Zehra Ozdemîr, Yagmur Ereren, Engîn Gokoglu, Suleyman Gokten, Aycan Çîçek, Nacîye Demîr, Behîç Aşçi, Barkin Tîmtîk ve Ozgur Yilmaz.
AMED/STENBOL