Çalakîya grevê vêşanî ya Nurîye Gulmene û Semîh Ozakçayî roja 219. de dewam kena. Nurîyeya ke Nêweşxaneyê Zîndanî ra bi hawayo zorî erşawîyaybî Nêweşxaneyê Numune, nika zî ewja ra erşawîyaya koguşê mehkuman yê nêweşxaneyî.
Babete ser o avûkate Parlamentera CHPyî Şenal Sarihane û avûkate Aytul Kaplane qisey kerdî. Parlamentere Sarihane va ‘Nurîye ser hişê xo de ya, labelê zaf zeyîf bîya’ û wina va: “Nurîyeye pêvînayîşê ma de dîyar kerde ke aye wazena ke biagêro zindan û miqatekerdox waşte. Hem cayo serwîsa lezgîne ya verêne û yê nikayîn de binê tecrîdî de yena tepiştiş. Seba ke Nurîye bi hawayo zeyîf dest bi grevê vêşanî kerdbî, rewşa aye baş nîya. Nurîye dîyar kena ke qet şewq nêkewena odeyê aye.”
Sarihane va ‘ganî Komîsyonê OHALî rewşa Nurîye û Semîhî ser o bi hawayo rew cigêrayîş bikero û karê înan tepîya bido înan’ û wina dewam kerde: “Nurîye verê cû weşîya aye sey mehne ameye nawitiş û nêardî mehkeme. Nika îxtîmal esto ke na mehkemeya vernîya ma de zî aye nêarî mehkeme. Na rewşe hem heqê aye yê pawitişî îxlal kena û hem zî heqê aye ya azadîye îxlal kena. Ganî kamcîn şert û merc de bibo, wa bibo bîyarî mehkeme. Ganî waştişê înan bêro esasgirewtiş.”
Doktorî sey leşkerî hereket kenî
Avûkate Kaplane zî va ‘pêvînayîşo peyên de destûr nêdîya ez şêra odeyê aye’ û wina domnaye: “Ma koridor de kursî ser de roniştî û ma pêvînayîş viraşt. Ode de sewbîna cilî estbî, labelê Nurîye tena bîye. Doktorê ke ewja de sey leşkerî hereket kenî. Nurîye nêwaşte ke ewja de bimano, waşte ke biagêro Nêweşxaneyê Zîndanî yê Sîncanî. Çimkî tîya de pêvînayîşê keye û avûkatî tena 5 deqa yo. Nurîye paweyî miqatekerdoxî ya û ma do na rewşe biresnî AÎHMî. Ma do heme rayîrî biceribnî.”
JINNEWS - ANQARA